کونسوڵخانەی نوێی ئەمەریکا لە هەولێر؛ ڕەهەندە ستراتیژییەکان و کاریگەرییە ناوخۆیی و ناوچەییەکانی

کردنەوەی کونسوڵخانەی نوێی ئەمەریکا لە هەولێر، کە لە ڕووی قەبارە و ئەرکەوە وەک گەورەترین کونسوڵخانەی ئەمریکی لە جیهان دادەنرێت، نیشانەیەکی ئاشکرایە بۆ گرنگیپێدانی ستراتیژی واشنتۆن بە هەرێمی کوردستان. ئەم دامەزراوە دیپلۆماسییە، کە لەسەر زەوییەکی نزیکەی 206 هەزار مەتر چوارگۆشە بنیات نراوە و توانای جێگیركردنی هەزار کارمەندی دیپلۆماسی و کارگێڕیی هەیە، لە چوارچێوەی پرۆتۆکۆلێکی ئاساییی دیپلۆماسیدا ناگونجێت. بەڵکوو، ئەم هەنگاوە دیپلۆماسییە وەک هێمایەکی سیاسی بەهێز لە قەڵەم دەدرێت کە کاریگەری سیاسی، ئابووری و ئاسایشیی بەرفراوانی لەسەر ئاستی ناوخۆیی، ناوچەیی و نێودەوڵەتییەکان بەجێ دەهێڵێت.

کردنەوەی ئەم دامەزراوە دیپلۆماسییە، پشتڕاستکردنەوەیە بۆ پابەندبوونی ئەمەریکا بە هاوبەشییەکی درێژخایەن لەگەڵ هەرێمی کوردستان. ئەم هەنگاوە ئەوە دەردەخات کە واشنتۆن دەیەوێت ڕۆڵێکی کاریگەر و بەردەوام لە ناوچەکەدا بگێڕێت، بەتایبەت لە عێراق.  لەم چوارچێوەیەدا، کونسوڵخانەکە دەبێتە میکانیزمێکی کارا بۆ جێبەجێکردنی ستراتیژییەتی ئەمەریکا لە عێراق و هەرێمی کوردستان.

 لە ڕووی سیاسییەوە، ئامادەیی بەهێزی دیپلۆماسیی ئەمەریکا لە هەولێر پێگەی هەرێمی کوردستان لە بەرانبەر حکوومەتی فیدراڵی لە بەغدا بەهێزتر دەکات. ئەم واقیعە دەتوانێت هاوسەنگییەکی نوێ لە هاوکێشەی هێزی نێوان هەولێر و بەغدا دروست بکات، بەتایبەت لە کاتێکدا کە پێگەی حکوومەتی هەرێم بە هۆی دەستێوەردانەكانی ئێران لە كاروباری عێراق لەبەردەم ئاڵنگاریی بەردەوامدایە. 

هەروەها، ئەم هەنگاوە پێگەی ناوچەیی هەرێم لە بەرانبەر وڵاتانی دەوروبەر پتەوتر دەکات و توانایی سیاسی و ئابووریی زیاتری پێ دەبەخشێت. لەلایەكی تروە، کونسوڵخانەکە دەتوانێت وەک پردێک بۆ پەیوەندییەکانی نێوان هەولێر و بەغدا ڕۆڵ بگێڕێت، بەتایبەت لە پرسە ستراتیژییەکان وەک دابەشکردنی داهاتی نەوت، مافی خاوەندارێتی سامانە سروشتییەکان و ململانێ ئاڵۆزەکانی نێوان هەردوو حکوومەت.

کونسوڵخانەی هەولێر، کە ستافی چەندین وەزارەتی حکوومەتی ئەمەریکا لە خۆ دەگرێت – لەوانە وەزارەتی دەرەوە، بازرگانی، وزە و پەروەردە – پلاتفۆرمێکی گونجاوە بۆ گەشەپێدانی هاوکارییە ئابوورییەکان. ئەم هاوکارییانە دەتوانن بوارەکانی وەبەرهێنان، وزە، تەکنەلۆژیا، فێرکاری و تەندروستی لە خۆ بگرن. 

بوونی کونسوڵخانەیەکی گەورەی ئەمەریکا لە هەولێر پەیامێکی ئەرێنی دەنێرێت بۆ کۆمپانیا نێودەوڵەتییەکان و وەبەرهێنەرانی بیانی سەبارەت بە سەقامگیری و دەرفەتە ئابوورییەکانی هەرێم. کونسوڵخانەی ئەمەریکا دەتوانێت ڕۆڵی هاندەرێكی كارا بگێڕێت لە ئاسانکاریکردنی پەیوەندییەکانی بازرگانی نێوان کۆمپانیا ئەمریکییەکان و هەرێمی کوردستان، کە دەتوانێت بوارێکی گونجاو بۆ وەبەرهێنانی دەرەکی دروست بکات و ژێرخانی ئابووری هەرێمی کوردستان بەهێزتر بکات.

بە بوونی ئەم کونسوڵخانەیە لە هەولێر، دەرفەتێکی باشتر بە هەرێم دەدرێت بۆ هەماهەنگکردنی هاوکاری لە بوارەکانی شەڕی دژ بە تیرۆر، بەرەنگاربوونەوەی توندڕەوی و ڕاهێنانی هێزە ئەمنییەتییەکان بەتایبەتی هێزەکانی پێشمەرگە كە بە یەکێک لە بەرچاوترین هێزە سەربازییەکانی ناوچەکە دادەنرێن و لە شەڕی دژ بە ڕێکخراوی دەوڵەتی ئیسلامی (داعش) لە ماوەی 2014-2017 ڕۆڵێکی سەرەکییان گێڕاوە و لەو كاتەوە پەیوەندییەكانیان لەگەڵ ئەمەریکا و هاوپەیمانان چووەتە قوناغێكی نوێوە.

 کونسوڵخانەی ئەمەریکا دەتوانێت هاوکاری لە بواری ڕاهێنان، چەک و تەکنەلۆژیای سەربازی و زانیاری ئەمنییەتی بەهێزتر بکات. هەروەها، ئامرازێكی کاراتر دەخاتە بەردەستی واشنتن بۆ چاودێریی پێشهاتە ئەمنی و سیاسییەکانی عێراق، هەرێمی کوردستان و ناوچەکە بەگشتی؛ لە سەردەمێکدا کە ژمارەیەک لە خانەکانی داعش هێشتا لە ناوچەكانی وەك (کەرکووک، دیالە، سەلاحەدین) هەن.

لە ڕوانگەی سیاسەتی دەرەوەی ئەمەریکاوە، بوونی کونسوڵخانەیەکی کاریگەر ڕۆڵی گرنگی دەبێت لە بەهێزکردنی سەقامگیری ناوخۆیی ناوچەکە لە ڕێگەی پشتیوانی سیاسی و ئابوورییەوە. ئەم هەنگاوە لە چوارچێوەی ڕکابەری ستراتیژیی نێوان ئەمەریکا و هێزە ناوچەییەکانی دیکەدا دێت، بەتایبەتی ئێران و تورکیا، کە هەردووکیان کاریگەری بەهێزی لە هەرێمی کوردستان هەیە.

ئێران، کە سنوورێکی نزیکەی هەزار و 599 کیلۆمەتری لەگەڵ عێراقدا هەیە، هەمیشە هەوڵی داوە کاریگەریی سیاسی و ئابووری لە هەرێمی کوردستان پاراستبێت. تورکیا لەلایەکی ترەوە، بە هۆی نیگەرانییەکانی لە بارەی پارتی کرێکارانی کوردستان (PKK)، بەردەوام پاڵنەرە سەربازییەکانی لە باکووری هەرێمی کوردستان بەرفراوانتر دەکاتەوە. لەم چوارچێوەیەدا، کونسوڵخانەی ئەمەریکا دەتوانێت وەک هاوسەنگەرێک بۆ کاریگەری ئەم هێزانە کار بکات.

لە كۆتاییدا دەكرێت ئاماژە بەوە بكرێت، كە کردنەوەی کونسوڵخانەی نوێی ئەمەریکا لە هەولێر تەنها ڕووداوێکی دیپلۆماسی تەقلیدی نییە، بەڵکوو ڕووداوێکی سیاسیی ستراتیژییە کە ڕەنگدانەوەی خواستی ئەمەریکایە بۆ بەهێزکردنی بوونی خۆی لە عێراق، بەتایبەتی لە هەرێمی کوردستان و پشتیوانیکردن لە هاوبەشییەکی درێژخایەن لەگەڵ هەرێم. ئەم هەنگاوە کاریگەری فرەلایەنەی لەسەر هاوکێشەی هێزی ناوخۆیی و پەیوەندییە ناوچەییەکان دەبێت.

بۆ هەرێمی کوردستان، کونسوڵخانەکە دەرفەتێکی مێژووییە بۆ بەهێزکردنی پێگەی سیاسی، گەشەپێدانی ئابووری و بەهێزکردنی توانای ئاسایشیی. بەڵام لە هەمان کاتدا، ئەم دەرفەتانە پێویستیان بە بەڕێوەبردنێکی ورد و هۆشیارانەیە لە بەرامبەر هێزە ناوچەییەکانی دیکە، بەتایبەتی ئێران و تورکیا. سەرکەوتنی هەرێمی کوردستان لە سوودوەرگرتن لەم هەلە ستراتیژییە، بەندە بە توانای هەماهەنگیی نێوان هەولێر و بەغدا، چارەسەرکردنی کێشە ناوخۆییەکان و بەردەوامبوون لە پێشخستنی چاكسازییە دامەزراوەییەکان.

لە کۆتاییدا، کونسوڵخانەی ئەمەریکا لە هەولێر نیشانەیەکی دیارە بۆ گرنگی ستراتیژی هەرێمی کوردستان لە سیاسەتی دەرەوەی ئەمەریکا و هاوکات پەیامێکە بۆ هێزە ناوچەییەکان کە واشنتن بەردەوام دەبێت لە گێڕانی ڕۆڵێکی کاریگەر لە ڕۆژهەڵاتی ناوەڕاست.