گەڕەکا دی یا جەنگێ ئەمریکا و ئیرانێ ئەڤێ جارێ بێی ئیسرائیل

گەڕەکا دی یا جەنگێ، ئەمریکا دڤێت ئەڤێ جارێ بێی ئیسرائیل جەنگ دەست پێ بکەت. ئەمریکا ژ شەڕێ 12 رۆژی یێ ساڵا 2025 دزانیت کو شەڕ دگەل رژێما ئیرانێ نە شەڕەکێ ب ساناھی یە. هەروەسا ئەمریکا دزانیت ل دۆسەیا ئیرانێ دا یا هاتییە خاپاندن ژ لایێ ئیسرائیلێ ڤە، ل سەر وان داتا و راپۆرتێن هەواڵگری یێن هاتینە دان ژ لایێ ئیسرائیلێ ڤە بۆ ئیدارا دۆناڵد ترامپی. لەوما ئیران باش دزانیت کو ئەمریکا ناخوازیت هێرشەکا هشکیاتیێ (بەژایی) یا بەرفرەهـ بکەتە سەر ئیرانێ، لەورا ئیران ب ساناھی ناهێتە بن وان خاڵ و مەرجێن ئەمریکا دڤێت ل سەر ئیرانێ جێبەجێ بکەت.

ئەو هێرشا ئەمریکا کرییە سەر بەندەرێن ئیرانێ، چەندین پەیام بۆ ئیرانێ هنارتن دا کو ئیران سازشێ بکەت:

1- ئەمریکا بۆ ئیرانێ دیار بکەت کو پەشیمان نینە ژ هێرشا سەر وێ و کوشتنا رێبەرێ وێ عەلی خامنەیی.

2- ئەمریکا دڤێت بۆ ئیرانێ دیار بکەت کو دووبارە دێ ئابوورێ وێ ژ ناڤ بەت.

3- ترساندنا شاندێ ئیرانێ ژ ئارمانجگرتنا وان ژ لایێ ئەمریکایێ ڤە.

4- ئەمریکا دڤێت بزانیت کا بەرسڤا ئیرانێ بۆ هێرشێن ئەمریکایێ دێ د چ ئاستەکیدا بیت.

5- ئەمریکا دروشمێ ژناڤبرنا رژێما ئیرانێ دووبارە ل هزرا ئیرانێ بینیت.

ب شێوەیەکێ گشتی هەردوو دەولەتێن ئەمریکا و ئیران بێزارن ژ ڤی جەنگی، سەرەڕای وێ چەندێ، ئەو ماوەیێ 60 رۆژی یێ بۆ لێکتێگەهشتنێ هاتییە ئیمزاکرن بەرەڤ دووماهییێ دچیت. هەردوو لایەن خۆ ئامادە دکەن بۆ گەڕەکا دی یا جەنگێ، و ئەمریکا دڤێت ئەڤ جارە بێی ئیسرائیل جەنگ دەست پێ بکەت دا کو راوەستاندنا جەنگی ب ساناھیتر بیت.

ئەز ل وێ باوەڕییێ مە کو مەرجێن ئەمریکایێ بۆ ئیرانێ (ڤەکرنا گەروویێ هورمز = راگرتنا سزایێن ئابووری)، هەروەسا (ژناڤبرنا بەرنامێ ئەتۆمی = مانا رژێما ئیسلامی یا ئیرانێ)نە، د بەرانبەردا ئیران دبینیت دەستبەرداربوون ژ بەرنامێ ئەتۆمی خۆکوژیا وێ یە. د نوکەدا ئەگەرێ شەڕی مسۆگەرترە ژ گەهشتن ب ئاشتییێ، لەوما ئەمریکا و ئیسرائیلێ چەندین ناڤێن بەرپرسێن ئیرانێ دەستنیشانکرینە بۆ کوشتنا وان.

ئیران ژی دێ ل سەر وێ ستراتیژییەتا خۆ بەردەوام بیت کو هاڤێتنا مووشەکانە بۆ دەولەتێن کەنداڤی و گرتنا گەروویێ هورمزە، ژبەرکو چ کارتێن دی د دەستێ ئیرانێدا نینن. هەروەسا دۆناڵد ترامپی گەلەک جاران بەحس ل بۆردۆمانکرنا بەندەر و وێستگەهێن کارەبێ و پرێن هاتنوچوونێ کرییە و گۆتییە دێ ئیرانێ زڤڕینمە چاخێن بەرێ. ئەمریکایێ بۆ رادەستکرنا ئیرانێ، تنێ ئەڤ بژاردەیە یا د دەستدا هەی بۆ ب لەز دووماهیئینانا ڤی شەڕی.

ئیرانێ دڤێت شەڕ درێژتر بکێشیت دا کو دەڤەر هەمی بکەڤیتە بن قەیرانەکا ئابووری دا. بۆ راوەستاندنا جەنگی د ڤی ماوەیێ بۆریدا، هەردوو دەولەتان تا رادەیەکا باش خۆ ئامادە کرییە، رۆژێن بێهێن دێ بەرسڤا گەلەک پرسیاران دەن.