رۆلێ ئۆپۆزسیۆنێ د ئاڤاکرنا دەولەتێدا

بێگومان هەبوونا ئۆپۆزسیۆنێ د ناڤ هەر وەلاتەکێ دا گەلەک گرنگە. وەلات بێ ئۆپۆزسیۆن وەک ئوتومبێلەکا بێ برێکە. لێ ئەو ئۆپۆزسیۆنە دڤێت نەبیتە ئەگەرێ دووبەرەکی و مەترسیێ لسەر وێ دەولەتێ.

ئۆپۆزسیۆنا راستەقینە رۆلەکێ گرنگ دبینیت د ئاڤاکرنا هەر دەولەتەکێ دا، بەلێ دڤێت بزانیین هندەک جۆرێن ئۆپۆزسیۆنێ ل هندەک وەلاتان رۆلێ خرابکرنا وەلاتان دبینن، بەروڤاژی پێشخستنا وەلاتی، رێکا خرابکرنا وەلاتی جێبەجێ دکەن.

رۆلێ ئۆپۆزسیۆنێ ل هندەک وەلاتێن پێشکەفتی:

•  فرەیی یا سیاسی ب هێز دکەت.

•  شەفافیەتێ دروست دکەت و گەندەلیێ کێم دکەت.

•  گەنگەشا سیاسی دەولەمەندتر دکەت.

•  بەرەڤانی ژ مافێ کێمینەیان دهێتە کرن.

ئەڤە ئۆپۆزسیۆنا ئەرێنی یە. ئۆپۆزسیۆنا کو دژایەتیا دەستەلاتێ دکەت، نە دژایەتیا وەلاتی.

رۆلێ ئۆپۆزسیۆنێ دناڤ پرۆسەیا سیاسی یا هەرێما کوردستانێ دا:

ل هەرێما کوردستانێ، مخابن هندەک جار ئۆپۆزسیۆن ژ رۆلێ خۆ یێ سەرەکی دەردکەڤیت و دبیتە ئەگەرێ لاوازکرنا قەوارەیا هەرێمێ:

•  نەکاراکرنا پەرلەمانێ کوردستانێ.

•  رێگری کرن د دانانا دەستوورەکێ بۆ هەرێما کوردستانێ دا.

•  رێگری کرن د جێبەجێکرنا پرۆژەیێن حکومەتێ ل سنۆرێ سلێمانیێ دا.

•  دروستکرنا دووبەرەکیێ د ناڤبەرا هەولێر و سلێمانیێ دا و لاوازکرنا یەکریزیا نیشتمانی.

•  بێهیڤی کرنا گەنجان ب پرۆسەیا سیاسی و هنارتنا پەیامێن نەرێنی کو حکومەت چ تشت ناکەت.

•  هەماهەنگی کرن ل گەل لایەنێن دەرەکی و بەغدا بۆ لێدانا قەوارەیا هەرێمێ و بڕینا مووچە و بودجەی.

ب کورتی، هەرێما کوردستانێ پێدڤی ب ئۆپۆزسیۆنەکا نیشتمانیە، نە ئۆپۆزسیۆنا تێکدانێ. ئۆپۆزسیۆنا کو رەخنێ ل حکومەتێ بگریت بۆ چاکسازیێ، نەک بۆ نەمانا هەرێمێ.