لێدوانی ئۆفلاین

​دیارە غافڵ بووین لە دەستکەوتێکی یاسایی بێوێنە: "هەڵوەشاندنەوەی دەستوور بە لێدانی کوشندە لەبەردم کامێراکاندا!"

​بەڕێز پارێزگاری کەرکووک بە بۆچوونێکی سحراوی سەرساممان دەکات کە گوایە ماددەی 140 "نەماوە". وەک ئەوەی ئیرادەی ملیۆنان هاووڵاتی بە "لێدوانێک" بسڕدرێتەوە! بەڕێزیان دەبێت باش بزانێت کە خۆی بە ڕێکەوتنێکی گوماناوی و تاریکولێلی شەوانەی هوتێلی ڕەشید بووە پارێزگار، تا ئەو رادەیەی رەنگە تا ئێستاش بۆ خۆیشی سەیر بێت کە چۆن گەیشتووەتە ئەو کورسییە!

​دیارە لای جەنابیان پێشێلکردنی دەستوور بووەتە خوو و سەربووردی ڕۆژانە؛ جارێک بە ئامادەبوونی لە کۆڕبەندی شارەکان بە زمانی تورکی وەک ئەوەی لە پارێزگایەکی دراوسێ فەرمانڕەوایی بکات نەک کەرکووک، و جارێکی تریش بە راگەیاندنی "مردنی" ماددەی 140!.

​بۆ بەڕێزیان وەبیر دێنینەوە کە دادگای باڵای فیدراڵی بە بڕیاری (103/اتحادية/2019) ئەم مەتەڵەی یەکلاکردووەتەوە؛ کە تێیدا جەختی کردووەتەوە ماددەی 140 بەکارە و بە جاریی دەمێنێتەوە تا قۆناخەکانی (ئاساییکردنەوە، سەرژمێری، راپرسی) جێبەجێ دەکرێن.

​دەستوور بە جەڵتەی قسەکردن نامرێت، و بڕیاری دادوەریش بە ئاواتی سیاسی هەڵناوەشێتەوە. خۆزگە کۆپییەکی لە "دەستوورە نوێ " یەکەی پێدەداین تا بزانین ئەم ماددەیە چۆن بە هەوادا بەڵام بووەتەوە؟ ئەگەر هەڵوەشاندنەوەی ماددەکان بەم ئاسانییە بێت لە رێگەی شاشەکانەوە، ئیتر بۆچی خۆمان بە پەرلەمان و دامەزراوەکانەوە ماندوو بکەین؟ چاوەڕێی لێدوانی داهاتوو دەکەین تا بزانین دوای هەواڵەکان کام ماددەی تر بەسەر دەچێت!.