ئهمهریكا: له كاریگهریی قەیرانی ئابووری كوردستان تێدهگهین
پێویسته هاوپهیمانی نێودهوڵهتی هاوكاری ههرێم بكهن
K24 - ههولێر:
باڵیۆزی ئهمهریكا له عێراق رایگهیاند، وڵاتهكهی له كاریگهریی قەیرانی ئابووری ودابینكردنی پێداویستییەكانی هێزی پێشمەرگەی كوردستان تێدهگات.
ستیوارت جۆنز باڵیۆزی ئهمریكا له عێراق ئهمڕۆ یهكشهممه 24ی كانوونی دووهم/ یهنایهری 2016، لهگهڵ شاندێكدا سهردانی مهسرور بارزانی راوێژكاری ئهنجوومهنی ئاسایشی ههرێمی كوردستانی كرد.
له دیدارێكدا باس له قهیرانی ئابووری ئێستای ههرێمی كوردستان كرا و جەختیش لەوە كرایەوە، كە پێویستە هاوپهیمانی جیهانی لە تێپەڕاندنی ئهو قەیران و كێشانهدا یارمەتیی ههرێمی كوردستان بدات.
هەر لەم دیدارهدا ڕۆشنایی خرایە سەر سەردانی ئهم دواییهی شاندی ههرێمی كوردستان بۆ واشنتۆن و ئەنجامی ئەو سەردانە بە سوودبەخش وەسفكرا.
ههروهها گفتوگۆ لهبارهی ئۆپهراسیۆنی ئازادكرنی موسڵكرا و مهسرور بارزانی لهمبارهیهوه گوتی: "پێویسته پێش دهستپێكردنی ئۆپهراسیۆنی ئازادكردنی مووسڵ میكانیزمێكی كارا بۆ پێكهوه كاركردنی هێزهكان له پێكهاتهكانی ئهو شاره بدۆزرێتهوه".
لە دیدارهكهدا، دوا پهرهسهندنهكانی بارودۆخی جهنگی دژ به تیرۆریستان لە پارێزگاكانی نەینەوا و ئەنبار و سەركەوتنەكانی هێزی پێشمەرگە لە شنگال و كاریگەریی ئەو سەركەوتنانە لەسەر شەڕهكه تاوتوكرا.
راوێژكاری ئهنجوومهنی ئاسایشی ههرێمی كوردستان دووپاتی له بایەخی تێكشكاندنی سهربازییانهی داعش و ئازادكردنی موسڵ كرد، كه كاریگهری ئهرێنی بهسهر ئایندهی شهڕهكهوه دهبێت، و گووتیشی پێویسته میكانیزمێكی كارا بۆ پێكهوه كاركردنی هێزهكان بدۆزرێتهوه، كه نهبێته هۆی دروستبوونی حهساسیهت له نێوان پێكهاتهكانی ئهو شارهدا.