كۆمسیۆنی ھەڵبژاردن: كار بە سیستمی نوێی ھەڵبژاردنی عێراق ناكەین
شارەزایەكی ھەڵبژاردن: بۆ ئەم سیستمە دەبێ لە یەك كاتدا لە ھەموو عێراق كارەبا ھەبێت
K24- ھەولێر:
كۆمسیۆنی باڵای سەربەخۆی ھەڵبژاردنەكانی عێراق سەرقاڵی سیستمی نوێی بایۆمەترییە بۆ تۆماركردنی ناوی دەنگدەران، بەڵام سەرۆكی كۆمسیۆنی ھەڵبژاردن و راپرسیی لە ھەرێمی كوردستان رایگەیاند، ئەوان كار بەو سیستمە ناكەن.
ھەندرێن محەممەد، سەرۆکی كۆمسیۆنی ھەڵبژاردن و راپرسیی لە ھەرێمی كوردستان لە لێدوانێكدا بە (كوردستان24)ی راگەیاند: "بە ھیچ شێوەیەك سیستمی بایۆمەتریی لە ھەرێمی كوردستان بەكار ناھێنین بۆ ھیچ ھەڵبژاردنێك، چونكە ئەوە پڕۆژەی بەغدایە".
هەندرێن محەممەد گوتیشی: "ئێمە وەك ھەرێمی كوردستان ئەگەر بیر لە بەكارھێنانی تەكنەلۆجیا بكەینەوە بە تایبەتیی كارتی ئەلكترۆنیی ئێستا پڕۆژەی ئاسانتر ھەن".
ھۆگر چەتۆ، شارەزای پرۆسەی ھەڵبژاردن لەم بارەوە دەڵێ: "سیستمی بایۆمەتریی پێویستی بە بواری لۆجستیی گرنگ ھەیە، پێویستە كارەبا لە ھەموو عێراق لە یەك كاتدا ھەبێت، چونكە ئەو سیستمە بە رێگەی ئینتەرنێتەوە ھەمووی بەیەكەوە دەبەستێتەوە".
رونیكردەوە: "لە سیستمی بایۆمەتریی دەنگدەر كاتێك یەكجار دەنگیدا ناتوانێت لە بنكەیەكی دیكە دەنگبدات".
كۆمسیۆنی ھەڵبژاردن و راپرسیی لە ھەرێمی كوردستان بەپێی یاسای ژمارە 4 ساڵی 2014 لە پەرلەمانی كوردستان متمانەی وەرگرتووە و ئێستا سەربەخۆیە لە بڕیارەكانی خۆی بۆ پەسەندكردنی سیستمی بایۆمەتریی یان رەتكردنەوەی.
داڕشتنەوە: ھەڤاڵ مەلا