رووسیا وادەی پێدانی سیستمێکی پێشکەوتووی مووشەکی بە ئێران دواخست
رووسیا: بە ھۆكاری دارایی گواستنەوەی مووشەكەكان بۆ ئێران راگیراون
K24 – ھەولێر:
وەزارەتی بەرگریی رووسیا رایگەیاند بەھۆی پابەند نەبوونی ئێران بە بەڵێنی دارایی، ناردنی كاروانی مووشەكی ئێس 300 بۆ ئەو وڵاتە راگیراوە.
گرێبەستی مووشەكی ئێس 300 چەندین ساڵە لە نێوان ئێران و رووسیا واژۆ كراوە، تا ھەفتەی رابردوو ھەواڵەكان لەسەر گەیشتنی ئەو مووشەكانە بۆ ئێران گەرم بوون.
وەزیری بەرگریی ئێران، حوسێن دێھقان كە بە مەبەستی كڕینی لیستێك لە چەك و كەرەستەی سەربازیی سەردانی مۆسكۆی كردبوو بە دەستی بەتاڵ گەڕاوتەوە بۆ تاران.
ھەرچەندە ئێران لە كاتی سەردانی حوسێن دێھقان رایگەیاند: "بڕیارە بە رێگەی دەریای قەزوینەوە مووشەكەكان بگەنە تاران"، بەڵام جارێكی دیكە گواستنەوەی ئەو مووشەكانە بۆ تاران راگیران.
لە راگەیەندراوەكەی وەزارەتی دەرەوەی رووسیادا ھاتووە: "بەھۆكاری دارایی گواستنەوەی مووشەكەكان بۆ ئێران راگیراون".
ھاوكات ئاژانسی تاسی رووسیا بلاویكردەوە: "چوار كاروانی مووشەكی بەرگریی ئێس 300 بە بەهای یەك ملیار دۆلار كە بڕیار بوو لە لایەن رووسیاوە رادەستی ئێران بكرێت، راگیراوە".
مۆسكۆ دەڵێت: "بەھۆی پابەند نەبوونی ئێران بە بەڵێنە داراییەكانی مووشەكەكانمان رادەستی ئەو وڵاتە نەكردووە".
سەرەڕای ناڕەزایەتی بەرپرسانی ئەمریكا و ئیسرائیل، بەڵام بەرپرسانی ئێران لە سەر كڕینی ئەو مووشەكانە چەندینجار لەگەڵ سەرۆكی رووسیا، ڤلادیمێر پوتین كۆبوونەتەوە.
لە 2007ەوە تا كاتی رێككەوتنی ناووكی ئێران و وڵاتانی 5+1 لە ساڵی 2015 گرێبەستی كڕین و فرۆشتنی ئەو مووشەكانە لە نێوان ئەو دوو وڵاتەدا بە ھەڵپەسێردراوی مابووەوە، بەڵام جێبەجێنەكردنی ئەو رێككەوتنە گومانی خستووەتە سەر گرێبەستە سەربازییەكانی دیكەش لەگەڵ ئێران.
ئا: تروسكە سادقیی
