ھارۆڵد رۆد: دەرچوونی ترەمپ لە بەرژەوەندی کوردە

K24 - ھەولێر:

ھارۆڵد رۆد، لێكۆڵەری تایبەتی پێنتاگۆن رایگەیاند، ترەمپ زۆر گرنگی بە ھاوپەیمانەکانی ئەمریکا دەدات کوردیش ھاوپەیمانێکی گرنگی ئەمریکایە.

ھارۆڵد رۆد، لە میانەی بەشداری لە ھەواڵەکانی (کوردستان٢٤) لە واشنتن رایگەیاند: " دەرچوونی دۆناڵد ترەمپ کاندیدی کۆمارییەکان لە بەرژەوەندی کوردە، چونکە ترەمپ زۆر گرنگی بە ھاوپەیمانەکانی ئەمریکا دەکات، کوردیش باشترین ھاوپەیمان ئەمریکایە لە رۆژھەڵاتی ناوەراست".

لەبارەی سیاسەتی دیموکراتەکان و ئیدارەی ئۆباما ھارۆڵد رۆد،  رایگەیاند: "لەماوەی حەوت ساڵ و نیوی رابردوودا ئەمریکا سەرۆکایەتیەکی لاوازی ھەبووە، بەتایبەتی بەرامبەر بە کێشەی کورد".

 ھارۆڵ رۆد گوتیشی:" ھیوادارم سەرۆکی داھاتووی ئەمریکا پشتگیری لە راگەیاندنی دەوڵەتی سەربەخۆی کوردستان بکات".

تا ئێستا ململانێیەكی سەخت ھەیە لە نێوان كاندیدانی پارتی كۆماریی و دیموكراتەكان، چاودێران پێیانوایە ئەگەر ترەمپ لە ھەڵبژاردنەکانی ١٥ی ئەم مانگە سەرکەوتوو بێت، ئەو کات ده‌كرێت بگوترێت، تارادەیەك بەربەستەکانی بڕیوە و ئومێدی ئەوە ھەیە ببێتە تاکە کاندیدی کۆمارییەکان بۆ گەیشتن بە کۆشکی سپی.

 داڕشتنەوە: ش، م