کازمی: بۆ هەڵبژاردن خۆم کاندید ناکەم

K24 - ھەولێر

سەرۆک وەزیرانی عێراق، جەخت لەسەر ئەنجامدانی هەڵبژاردن لە وادەی خۆیدا دەکاتەوە و راشیگەیاند، خۆی کاندید ناکات.

مستەفا کازمی، سەرۆک وەزیرانی عێراق لە چاوپێکەوتنێکدا لەگەڵ رۆژنامەی زە ناشناڵ-ی ئیماراتی، ئاشکرایکرد، هەرچەندە بەشێک لە لایەنە سیاسییەکان، داوای دواخستنی هەڵبژاردنەکان دەکەن، بەڵام لە کاتی دیاریکراوی خۆیدا، 10ی تشرینی یەکەم ئەنجام دەدرێت.

کازمی دووپاتیکردەوە، ئەو نابێتە بەشێک لە ململانێکان و خۆی هەڵنابژێرێت.

هەروەها سەرۆک وەزیرانی عێراق ئاماژەی بۆ ئەوەکرد، هەر لە یەکەم رۆژی دەستبەکاربوونی لە پۆستی سەرۆک وەزیران، کاری بۆ چەسپاندنی یاسا و کۆنتڕۆڵکردنی میلیشیاکان و باندەکانی لە یاسادەرچوو کردووە، بەڵام ئاستەنگی زۆری هاتووەتە پێشەوە.