وڵاتێکی ئەورووپی بە هۆی کۆرۆنای دێڵتا رێنمایی نوێ دەردەکات

K24- هۆڵەندا:

دوای کرانەوەی زۆربەی شوێنە داخراوەکان لە سەرانسەری ئەوروپا، کە بە پێی ڕێنماییە تەندروستییەکان بۆ خۆپارێزی لە پەتای کۆرۆنا، لەسەرەتای مانگی تەمووز و گۆڕینی رەنگی وڵاتەکان لە سوورەوە بۆ زەرد و دواتر سپی، چەند رۆژێکە شەپۆلی پەتای کۆرۆنا و  کۆرۆنای ناسراو بە (زنجیرەی دێڵتا)، دووبارە وڵاتە ئەورووپییەکانی ناچار کردووە رێوشوێنی داخستن و رێنمایی نوێ بۆ خۆپارێزی دەربکەنەوە.

هۆڵەندا یەکێک لەو وڵاتانەیە، دووبارە ژمارەی تووشبوان بە پەتای کۆرۆنا لە هەڵکشانێکی چاوەڕوان نەکراودایە، دوێنێ سەرۆکوەزیرانی دەستلەکارکێشاوە و وەزیری تەندروستی ئەو وڵاتە، لە کۆنگرەیەکی رۆژنامەوانیدا دووبارە بڕیاری داخستنەوەی رێستۆرانت و شوێنی شەوانەیاندا.

بەپێی رێنماییەکان دەبێت لە کاتژمێر 12ی شەو، تا 6ی بەیانی، هەموو جۆرە چالاکیەک و کۆبوونەوەی بە کۆمەڵ و دانانی شاشەی گەورە بۆ یاری کۆتایی جامی ئەوروپا، قەدەغەکرا،  دووبارە دووری نێوان کەسەکان مەتر و نیوێک بێت و هەمووان ئاگاداری خۆپارێزی بن، گرنگی بە دەست شوشتن بدەن و لەکاتی هەستکردن بە نیشانەکانی پەتاکە، تێست بکرێن.

هۆکاری دووبارە داخستن و رێنماییە نوێیەکان، بۆ بەرزبوونەوەی رێژەی تووشبووان بە پەتای کۆرۆنا، دەگەڕێتەوە، پێشتر ژمارەی تووشبووان لە هەفتەیەکدا 4208 کەس بوو، لەم هەفتەیەدا ژمارەکە بۆ 8541 کەس بەرزبووەتەوە.