سەرۆکی حکومەتی هەرێمی کوردستان پێشوازی لە یاریدەدەری جێگری وەزیری دەرەوەی ئەمەریکا دەکات

K24- هه‌ولێر:

ئەمڕۆ پێنجشەممە، 30ی ئەیلوولی 2021 مەسرور بارزانی، سەرۆکی حکومەتی هەرێمی کوردستان، پێشوازی لە شاندێکی ئەمەریکی کرد بە سەرۆکایەتی جێنیفەر گاڤیتۆ، یاریدەدەری جێگری وەزیری دەرەوەی ئەمەریکا بۆ کاروباری عێراق و ئێران.

لە کۆبوونەوەکەدا، کە رۆبەرت پالەدینۆ، کونسوڵی گشتی ئەمەریکا لە هەرێمی کوردستان ئامادەی بوو، بارودۆخی عێراق و پەیوەندییەکانی هەرێمی کوردستان و ئەمەریکا تاووتوێ کرا.

یاریدەدەری جێگری وەزیری دەرەوەی ئەمەریکا، ئاماژەی بە پێگەی گرنگ و تایبەتی هەرێمی کوردستان دا، کە ئەمەریکا بە بایەخەوە لە پەیوەندییەکانی لە گەڵ هەرێم دەڕوانێت و سەردانەکەشی بۆ دووپاتکردنەوەی پشتیوانیی ئەمەریکایە لە هەرێمی کوردستان.

سەرۆکی حکومەت، سوپاسی پشتیوانیی بەردەوامیی ئەمەریکای لە هەرێم کرد و کورتەیەکی دەربارەی چاکسازییەکانی حکومەتی هەرێمی کوردستان، لە بواری هەمەجۆرکردنی سەرچاوەکانی داهات و بنیاتنانی ژێرخانێکی بەهێزی ئابووری خستەڕوو  .

هەڵبژاردنەکانی ئەنجومەنی نوێنەرانی عێراق و دایەلۆگی ستراتیجی عێراق و ئەمەریکا و رووبەڕووبوونەوەی هەڕەشەکانی تیرۆر، چەند تەوەرێکی دیکەی گفتوگۆکان بوون.

H.B