پارتی سەرکەوتنی دوو کاندیدی لە کەرکووک راگەیاند

K24 – کەرکووک

بەرپرسی راگەیاندنی لقی 3ی پارتی دیموکراتی کوردستان لە کەرکووک، ئاشکرای کرد، دوو کاندیدی حزبەکەی لە هەڵبژاردنی پێشوەختە بۆ پەرلەمانی عێراق سەرکەوتوون.

ئەحمەد خورشید، بەرپرسی راگەیاندنی لقی 3ی پارتی لە کەرکووک بە کوردستان24ی راگەیاند: "دوو کاندەکەی پارتی لە هەردوو بازنەی یەک و دوو لە کەرکووک سەرکەوتوون".

روونیکردەوە: "شاخەوان عەبدوڵڵا زیاتر بە 30 هەزار دەنگ یەکەمی سەر ئاستی کەرکووکە و نەجوا حەمید بە زیاتر لە 10 هەزار دەنگ سەرکەوتووە".

کۆمسیۆنی باڵای سەربەخۆی هەڵبژاردنەکانی عێراق رایگەیاندووە، رێژەی بەشداری دەنگدەران لە کەرکووک %43 بووە.