بەهۆی داڕمانی دیوارێکەوە کەسێك لە سلێمانی گیانی لەدەستدا

K24 - هەولێر:

کەمێک لەمەوبەر لە گەڕەکی عەقاری شاری سلێمانی، بەهۆی داکەوتنی دیوارێکەوە، هاووڵاتییەك گیانی لەدەستدا.

سامان نادر بەڕێوەبەری سەنتەری122 فریاکەوتنی سلێمانی بەکوردستان 24 ی  راگەیاند، لە ئێستادا تیمەکانی تەندروستی و پۆلیس لە شوێنی رووداوەکان و تەرمەکە براوە بۆ پزیشکی دادی.

بە گوێرەی زانیارییەکان، لە شوێنی رووداوەکە چەند بینایەك هەن، کە تەواو نەکراون و کاری بیناسازییان ماوە. 

رێکان جەمال سەرۆکی لیژنە هاوبەشەکانی قائیمقامیەتی سلێمانی لەوبارەیەوە رایگەیاند، ئەو کەسەی گیانی لەدەستداوە، هاوڵاتیەکەی عەرەبە و لەدایکبووی ساڵی 1972 بووە و بۆ گەشتوگوزار هاتووە بۆ سلێمانی و لەگەڵ چەند هاوڕێیەکیدا بەوێدا تێپەڕیوە.

باسی لەوەشکرد، بەهۆی کەوتنە خوارەوەی چەند بلۆکێك لە نهۆمەکانی سەرەوەی بیناکە گیانی لەدەستداوە.

رێکان جەمال راشیگەیاند، ئێستا کارکردنیان لە بیناکە راگرتووە و خاوەنەکەشی دەدەنە دادگا، چونکە چەند جارێك ئاگاداریان کردووەتەوە کە نابێت بەو شێوازە کار لەوبیانەیەدا بکرێت.