تاران: له‌گه‌ڵ به‌غدا له‌سه‌ر ئه‌م خاڵه رێككه‌وتووین
K24 – هه‌ولێر:
وه‌زیری ده‌ره‌وه‌ی كۆماری ئیسلامی ئێران، حسێن ئه‌میر عه‌بدوڵڵاهیان، رایگه‌یاند، تاران و به‌غدا له باره‌ی هه‌ڕه‌شه ئه‌منییه‌كانه‌وه دیدی هاوبه‌شیان هه‌یه.
گوتیشی: له كۆبوونه‌وه‌ی عه‌لی خامنه‌یی، رێبه‌ری باڵای شۆڕشی كۆماری ئیسلامی ئێران و محه‌ممه‌د شیاع سوودانی، سه‌رۆكی حكومه‌تی ئیتیحادی عێراق، پرسه جێبایه‌خه‌كانی نێوان ئێران و عێراق تاوتوێكراوون.
هه‌روه‌ها گوتی: هه‌ردوولا تێڕوانینیان چوونیه‌كه بۆ رێگرتن له هه‌ڕه‌شه و مه‌ترسییه ئه‌منییه‌كان.
روونیكرده‌وه، كۆماری ئیسلامی ئێران هیواخوازه له داهاتوویه‌كی نزیكدا، هێزه عێراقییه‌كان له ناوچه سنوورییه‌كان بڵاوبكرێنه‌وه و چه‌ك له لایه‌نه به‌رهه‌ڵستكاره‌كان داماڵرێت و كۆتایی به كاری ئه‌و لایه‌نانه له ناوچه‌كه بهێنرێت.
دوێنێ سێشه‌ممه (29ـی تشرینی دووه‌م/ نۆڤێمبه‌ری 2022)، محه‌ممه‌د شیاع سوودانی، رایگه‌یاندبوو، حكومه‌تی عێراق پابه‌نده به پاراستنی بنه‌ماكانی دراوسێیه‌تی و رێگه نادات له خاكه‌كه‌یه‌وه هه‌ڕه‌شه له ئاسایشی ئێران بكرێت.