نێچيرڤان بارزانى: ئەوه‌ى دەرهەق بە کوردانی فەیلی کرا پاکتاوێکی نەژادیی رەگەزپەرستانە بوو

K24 – هەولێر

سەرۆکی هەرێمی کوردستان بەبۆنەی 43مین ساڵەی تاوانەکانی جینۆساید و بێسەروشوێنکردن و وڵاتبەدەرکردنی کوردانی فەیلی پەیامێکی بڵاوکردەوە و رایگەیاند: ئەوه‌ى دەرهەق بە کوردانی فەیلی کرا پاکتاوێکی نەژادیی رەگەزپەرستانە بوو.

لە پەیامی نێچیرڤان بارزانی هاتووە: "ئەمڕۆ لە چل و سێيەمین ساڵیادی تاوانەکانی جینۆساید و بێسەروشوێنکردن و وڵاتبەدەرکردنی خوشک و برایانی کوردی فەیلیدا، بە رێز و شکۆوە یادی شەهیدان و قوربانييانى ئەو تاوانانە دەکەینەوە. ئەوه‌ى دەرهەق بە کوردانی فەیلی کرا، پاکتاوێکی نەژادیی رەگەزپەرستانە بوو. تيایدا وێڕای بێسەروشوێنکردنی دەیان هەزار هاووڵاتیی بێتاوان، سەدان هەزاریشیان دووچاری راگواستن و وڵاتبەدەرکردن و زەوتکردنی ماڵ و موڵکیان و لێسەندنەوەی رەگەزنامە بوونه‌وه‌ تەنها لەبەر کوردبوون و داکۆکیکردنیان لە ناسنامە و مافە رەواکانی میللەتەکەیان".

سەرۆکی هەرێمی کوردستان راشیگەیاند: "ناساندنی ئەو تاوانە بە جینۆساید لەلایەن دادگای باڵای تاوانەکانی عێراقەوە، حکومەت و دەوڵەتی عێراق رووبەڕووی ئەرک و بەرپرسیاریەتیی یاسایی و مرۆیی دەکاتەوە بۆ قەرەبۆکردنەوەی قوربانييان. لەم یادەدا داوا لە حکومەتی فیدراڵی عیراق دەکەین ئەرکى خۆى بەجێ بگەیەنێت به‌ قەرەبۆکردنەوە و گێڕانەوەی سەرجەم مافە مەدەنی و ماددییەکانی کوردانی فەیلی".

دەقی پەیامی سەرۆکی هەرێمی کوردستان:

ئەمڕۆ لە چل و سێيەمین ساڵیادی تاوانەکانی جینۆساید و بێسەروشوێنکردن و وڵاتبەدەرکردنی خوشک و برایانی کوردی فەیلیدا، بە ڕێز و شکۆوە یادی شەهیدان و قوربانييانى ئەو تاوانانە دەکەینەوە.

ئەوه‌ى دەرهەق بە کوردانی فەیلی کرا، پاکتاوێکی نەژادیی ڕەگەزپەرستانە بوو. تيایدا وێڕای بێسەروشوێنکردنی دەیان هەزار هاووڵاتیی بێتاوان، سەتان هەزاریشیان دووچاری ڕاگواستن و وڵاتبەدەرکردن و زەوتکردنی ماڵ و موڵکیان و لێسەندنەوەی ڕەگەزنامە بوونه‌وه‌ تەنها لەبەر کوردبوون و داکۆکیکردنیان لە ناسنامە و مافە ڕەواکانی میللەتەکەیان.

ناساندنی ئەو تاوانە بە جینۆساید لەلایەن دادگای باڵای تاوانەکانی عیراقەوە، حکوومەت و دەوڵەتی عیراق ڕووبەڕووی ئەرک و بەرپرسیاریەتیی یاسایی و مرۆیی دەکاتەوە بۆ قەرەبۆکردنەوەی قوربانييان. لەم یادەدا داوا لە حکوومەتی فیدراڵی عیراق دەکەین ئەرکى خۆى بەجێ بگەیەنێت به‌ قەرەبۆکردنەوە و گێڕانەوەی سەرجەم مافە مەدەنی و ماددییەکانی کوردانی فەیلی.

دروود و سڵاو بۆ گیانی پاکی شەهیدانی کوردی فەیلی. سڵاو و ڕێز بۆ خانەوادە سەربەرزەکانیان. قوربانیدان و دڵسۆزیی خوشک و برایانی کوردی فەیليمان، جێی شانازیی گەلەکەمانە و هەمیشە لە یادمانن.

نێچيرڤان بارزانى

سه‌رۆكى هه‌رێمى كوردستان

2023/4/4