دەزگای هەڵبژاردنی پارتی و یەکێتی کۆدەبنەوە
K24 - هەولێر
بڕیارە ئەمڕۆ دەزگای هەڵبژاردنی پارتی دیموکراتی کوردستان و یەکێتی نیشتمانی کوردستان، لە نووسینگەی دەزگای هەڵبژاردنی پارتی کۆببنەوە.
ئەم کۆبوونەوەیە دوای سەردانی شاندی هاوبەشی هەردوولا بۆ لای نوێنەرانی پێکهاتەکان دەبێت و بڕیارە بۆچوون و رای نوێنەرانی پێکهاتەکان لەسەر یاسای هەڵبژاردن گفتوگۆیان لەبارەوە بکرێت.
ئەمە چوارەم کۆبوونەوەی دەزگای هەڵبژاردنی پارتی و یەکێتییە لەسەر پرسی کاراکردنەوەی کۆمسیۆنی باڵای هەڵبژاردن و راپرسی هەرێمی کوردستان و هەموارکردنەوەی یاسای هەڵبژاردن و تۆماری دەنگدان.
بەگوێرەی لێدوانەکانی پێشووی بەرپرسانی هەردوولا، لەسەر زۆرینەی پرسەکانی تایبەت بە هەڵبژاردن رێککەوتن و لێکتێگەیشتن لەنێوانیان هەیە.