شێروان شەمێرانی: بەپێی دەستوور هەرێـمی کوردستان بەشدار دەبێت لە داڕشتنی سیاسەتی نەوت و غاز

K24 – هەولێر

شێروان شەمێرانی شرۆڤەکاری سیاسی رایدەگەیەنێت، بەپێی دەستوور هەرێـمی کوردستان بەشدار دەبێت لە داڕشتنی سیاسەتی نەوت و غاز لە هەموو عێراق.

شێروان شەمێرانی، شرۆڤەکاری سیاسی لەمیانی بەشداریکردنی لە گەشتێکی هەواڵەکانی کوردستان24، لەبارەی رێککەوتنی هەولێر و بەغدا گوتی: "دەبێ رێککەوتنی نێوان هەولێر و بەغدا لە بودجەی عێراق رەنگبداتەوە، زیاتریش لەوە دەبێ هەوڵبدرێت کاتێک یاسای نەوت و غاز لە پەرلەمان تێپەڕێندرێت لەو دەبێ رێککەتنەکە رەنگبداتەوە، چونکە ئەم یاسایە هەمیشەییە لە ساڵی 2006ـەوە هەیە و تائێستا تێنەپەڕیوە، لە کاتی تێپەڕاندنی ئەگەر تێبینی و بۆچوونەکانی کورد لەبەرچاو نەگیرێن و رێککەوتنەکە تێیدا رەنگ نەداوە، دیسان کێشەکان سەر هەڵدەدەنەوە".

گوتیشی: "هەندێک لایەن و کەسایەتی سیاسی عێراق پێیان ناخۆشە کە رێککەوتن لەنێوان هەولێر و بەغدا کراوە، چونکە ئەوان دەیانەوێت لە رێگەی بڕیارەکەی دادگای فیدراڵی، کۆمپانیای سۆمۆ بە تەواوی هەژمونی خۆی بسەپێنێ بەسەر هەموو سەروەت و سامانی هەرێمی کوردستان، بەڵام رێککەوتنەکە رێگری لەو ئەجندایە کرد".

شێروان شەمێرانی، راشیگەیاند: "بوونی کێشەی دارایی لەنێوان هەولێر و بەغدا پەیوەندی بە نەبوونی یاسای نەوت و غازەوە هەیە، کاتێک کورد لە ساڵی 2005 بەشداربوو ەلە نووستینەوەی دەستوور، مافی ئەوە دەدات بە کورد کە بەشداربێت لە ئیدارەدانی سەروەت و سامانی خۆی، واتە بە تەواوی تەسلیمی بەغدا ناکرێت، تەنانەت دەبێ کورد بەشداربێت لە داڕشتنی سیاسەتی نەوت و غاز، ئەمە بڕگەیەکی دەستوورییە".

ئاماژەی بەوەشکرد: "بەرهەمهێنانی نەوت لەلایەن هەرێمی کوردستان پەوەندی بەو رێژەیەوە هەیە کە ئۆپێک دیاریکردووە، هەرێمی کوردستان دەتوانێت بە دوای نەوتی زیاتر دابگەڕێت و رێژەی بەرهەمهێنان زیاد بکات، بەڵام دەبێ بەو بنەمایە بێت کە کۆمپانیای سۆمۆ یان ستانداری جیهانی دەتوانرێت ئەو نەوتە بفرۆشرێت".