ئه‌مه‌ریكا و چین كۆمه‌ڵه‌یه‌ك سه‌باره‌ت به پرسه بازرگانییه‌كان داده‌مه‌زرێنن
K24 - هەولێر:
چین و ئه‌مه‌ریكا له‌سه‌ر دامه‌زراندنی كۆمه‌ڵه‌یه‌كی نوێی كاركردن بۆ تاووتوێكردنی ئاڵۆزییه‌كانی بواره‌كانی بازرگانی رێككه‌وتوون، هاوكات وه‌زیری بازرگانی ئه‌مه‌ریكا دامه‌زراندنی ئه‌م كۆمه‌ڵه‌یه به گرنگ ده‌بات بۆ كه‌مكردنه‌وه‌ی گرژییه‌كان له‌نێوان واشنتۆن و په‌ككین.
هه‌ر یه‌ك له جینا ریمۆندۆ، وه‌زیری بازرگانی ئه‌مه‌ریكا و وانگ وینتاو، وه‌زیری بازرگانی چین له كۆبوونه‌وه‌ی ئه‌مڕۆ (دووشه‌ممه 28ـی ئابی 2023)ـی نێوانیاندا كه له په‌ككینی پایته‌ختی چین به‌ڕێوه‌چوو، له‌سه‌ر دامه‌زراندنی كۆمه‌ڵه‌یه‌كی كار رێككه‌وتن كه ساڵانه دووجار و له‌سه‌ر ئاستی جێگرانی وه‌زیر كۆده‌بنه‌وه، هاوكات بڕیار وایه ئه‌مه‌ریكا میوانداری یه‌كه‌م كۆبوونه‌وه‌ی كۆمه‌ڵه‌كه بكات له‌سه‌ره‌تای مانگی كانوونی دووه‌می ساڵی داهاتوو (2024).
ئامانجی دامه‌زراندنی ئه‌و كۆمه‌ڵه‌یه بریتیی له دۆزینه‌وه چاره‌سه‌ری بۆ پرسه بازرگانییه‌كان و وه‌به‌رهێنان و هه‌نگاونانی به‌رژه‌وه‌ندییه بازرگانییه‌كانی ئه‌مه‌ریكا بۆ ناو چین.
ریمۆندۆ له‌میانی كۆبوونه‌وه‌ی له‌گه‌ڵ هاوتا چینییه‌كه‌ی دووپاتی كرده‌وه، ئه‌مه‌ریكا مه‌به‌ستی دامه‌زراندنی په‌یوه‌ندییه‌كی سه‌قامگیره له‌گه‌ڵ په‌ككین، هه‌روه‌ها ئاماژه‌ی به ئابووری هه‌ردوو زلهێزه‌كه‌ی جیهان كرد وه‌ك دوو گه‌وره‌ترین خاوه‌ن ئابووری جیهان.
رۆژی (یه‌كشه‌ممه 21ـی ئایاری 2021) جۆو بایدن، سه‌رۆكی ئه‌مه‌ریكا له كۆنگره‌یه‌كی رۆژنامه‌وانیدا كه له‌میانی به‌شداریكردنی له لووتكه‌ی كۆمه‌ڵه‌ی وڵاتانی حه‌وت له شاری هێرۆشیمای ژاپۆن به‌ڕێوه‌چوو، جه‌ختی له‌سه‌ر پێویستی دروستكردنی هێڵێكی گه‌رمی په‌یوه‌ندی له‌گه‌ڵ چین كرده‌وه.