ئاماری کۆتایی؛ رێژەی بەشداریکردن لە هەڵبژاردنی ئەنجوومەنی پارێزگاکان سەدا 41 بووە

K24 - هەولێر

کۆمیسیۆنی هەڵبژاردنەکانی عێراق رایدەگەیەنێت، رێژەی بەشداریکردن لە هەردوو هەڵبژاردنی تایبەت و گشتیی ئەنجوومەنی پارێزگاکان سەدا 41 بووە.

سەر لە بەیانیی رۆژی  شەممە، 16-12-2023، هەڵبژاردنی تایبەت و رۆژی دووشەممەش، 18-12-2023، هەڵبژاردنی گشتیی ئەنجوومەنی پارێزگاکانی عێراق لە 15 پارێزگای عێراق، ناوچە کوردستانییەکان و هەرێمی کوردستان دەستیپێکرد و، تا کاتژمێر 06:00ـی ئێوارە بەردەوام بوو.

دوانیوەڕۆی ئەمڕۆ سێشەممە، 19-12-2023، کۆمیسیۆنی باڵای سەربەخۆی هەڵبژاردنەکانی عێراق ئاماری کۆتایی بەشداریی دەنگدەران لە هەردوو هەڵبژاردنی تایبەت و گشتیی ئەنجوومەنی پارێزگاکانی عێراقی بڵاوکردەوە.

بە گوێرەی ئامارەکانی کۆمیسیۆن، رێژەی بەشداریی دەنگدەران لە هەڵبژاردنەکە سەدا 41 بووە؛ زۆرترین رێژەی بەشداریی دەنگدەران لە پارێزگای کەرکووک (سەدا 66) و کەمترینیشی لە پارێزگای بەغدا/ رەسافە (سەدا 21) بووە.

ئەنجوومەنی پارێزگاکان ئەرکی هەڵبژاردنى پارێزگار، چاودێکریکردنى حکومەتى خۆجێیی پارێزگاکانیان و پەسندکردنی پارەى پڕۆژەکانی پارێزگاکانیان لە ئەستۆ دەگرێت.

رێژەی بەشداریی دەنگدەران لە هەردوو هەڵبژاردنی گشتی و تایبەت لە پارێزگاکانی عێراق:

- کەرکووک: 66%

- سەڵاحەددین: 59%

- ئەنبار: 57%

- نەینەوا: 53%

- موسەننا: 45%

- دیالا: 43%

- بەسرە: 43%

- کەربەلا: 40%

- بابل: 40%

- قادسییە: 38%

- واست: 37%

- نەجەف: 32%

- زیقار: 31%

- میسان: 29%

- بەغدا / کەرخ: 32%

- بەغدا / رەسافە: 21%

تەنها هەڵبژاردنی تایبەتی ئەنجوومەنی پارێزگاکانی عێراق لە شارەکانی هەرێمی کوردستان ئەنجامدرا کە رۆژی شەممە، 16-12-2023 بەڕێوەچوو. لەنێو کەمپی ئاوارەکانی دانیشتووی هەرێمی کوردستان دەیان بنکەی دەنگدان بەرووی دەنگدەراندا کرابوونەوە بۆ ئەوەی بتوانن بەشداریی هەڵبژاردنەکە بکەن و دەنگ بدەن.

بە گوێرەی ئامارەکانی کۆمیسیۆن، رێژەی بەشداریی دەنگدەرانی تایبەت لە هەرێمی کوردستان بەم شێوەیە بووە:

- سلێمانی (هەڵبژاردنی تایبەت): 89%

- هەولێر (هەڵبژاردنی تایبەت): 81%

- دهۆک (هەڵبژاردنی تایبەت): 67%

ئەمڕۆ سێشەممە، لیژنەی باڵای هەڵبژاردنەکانی عێراق لە لە کۆنفرانسێکی رۆژنامەوانیدا، رایگەیاند، لە میانی هەردوو هەڵبژاردنی تایبەت و گشتیدا "زیاتر لە 300 کەس دەسگیرکراون و رادەستی یاسا کراون کە هەوڵیان دەدا یاساکانی کۆمسیۆن پێشێل بکەن، یاخود کڕین و فرۆشتن بە کارتەکانی دەنگدانەوە بکەن، هێزە ئەمنییەکان پێکەوە بەیەک چاو سەیری هەموو لایەنە سیاسییەکان و پێکهاتەکان دەکەن، توانیومان سەدا 70 بۆ 80ـی فلاش میمۆری چاودێری سندووقەکان، بەرێگای وشکانی و فڕۆکە بگوازینەوە بۆ نووسینگەی سەرەکی کۆمسیۆن لە بەغدا".