بەڕێوەبەری گشتیی پەروەردەی هەولێر: شایستەی دارایی مانگی شوباتی وانەبێژان خەرج دەکرێت
بەڕێوەبەری گشتیی پەروەردەی هەولێر ڕایدەگەیەنێت، شایستەی دارایی مانگی شوباتی وانەبێژان و شایستەی دارایی چاودێرانی هۆڵەکانی تاقیکردنەوەش بەم نزیکانە دابەش دەکرێن.
لوقمان سەعید سدیق، بەڕێوەبەری گشتیی پەروەردەی هەولێر بە کوردستان24ـی ڕاگەیاند، کۆی گشتیی وانەبێژان حەوت هەزار و 865 وانەبێژن لە سنووری بەڕێوەبەرایەتیی گشتیی پەروەردەی هەولێر بە هەر حەوت پەروەردەکەیەوە، دەشڵێت، کۆی گشتیی شایستەی داراییان، دوو ملیار و 992 ملیۆن و 743 هەزار دینارە دەشڵێت، ئەو شایستانە کراونەتە چەکی پارە و ئامادەیە، تەنها ماوە لە بانکەکان بۆیان خەرج بکەن.
سەبارەت بە شایستە داراییەکانی مانگی ئازار و نیسانی وانەبێژان، گوتی، لیستەکان ئامادە کراون و لە گەنجینە لە وردبینین.
لەبارەی شایستەی دارایی چاودێرانی هۆڵەکانی تاقیکردنەوەش کە بەڕێوەبەر و مامۆستایان و یاریدەدەرەکانیانن، بەڕێوەبەری گشتیی پەروەردەی هەولێر ئاشکرای کرد، شایستەی ئەوانیش کراونەتە چەکی پارە و لە ڕۆژانی داهاتوو خەرج دەکرێن.
