پەیامنێری کوردستان24: کەسێک لە نەجەف لەسەر پێنج ملیۆن دینار سێ ئەندامی خێزانەکەی کوشت
K24 – نەجەف:
لەسەر کێشەی پارە کەسێک لە پارێزگای نەجەف سێ ئەندامی خێزانەکەی دەکوژێت و یەکێکی دیکەش بریندار دەکات.
بەپێی زانیارییەکانی پەیامنێری کوردستان24 لە نەجەف، ئەو کەسەی تەقەی لە ئەندامانی خانەوادەکەی کردووە، بەهۆی کێشەیەکی قەرزەوە بووە کە بڕەکەی پێنج ملیۆن دینار بووە.
دوای ڕووداوەکەش، وەزارەتی ناوخۆی عێراق لە ڕاگەیەندراوێکدا ئاشکرای کرد: تۆمەتبارێکیان دەستگیر کردووە کە بەشێک لە ئەندامانی خێزانەکەی لە پارێزگای نەجەف کوشتووە.
بەپێی ڕاگەیەندراوەکەی وەزارەتی ناوخۆی عێراق، پۆلیسی نەهێشتنی تاوان لە نەجەف، تۆمەتبارێکیان دەستگیر کرد دوای ئەوەی تەقەی لە ئەندامانی خێزانەکەی کردووە و لە ئەنجامدا دایکی و دوو لە خوشک و براکانی کوشتووە و کەسێکی دیکەشی بریندار کردووە.
وەزارەتی ناوخۆی عێراق دووپاتی کردووەتەوە، ڕووداوەکە لە گەڕەکی یەرمووکی باکووری پارێزگای نەجەف بووە کە کێشەی دارایی پاڵنەری ئەنجامدانی ئەو تاوانە بووە.