لە شەش مانگی ڕابووردودا زیاتر لە 80 هەزار ئۆتۆمبیل هاوردەی هەرێمی کوردستان کراوە
K24 – هەولێر:
بەپێی ئامارەکانی وەزارەتی بازرگانی و پیشەسازیی حکوومەتی هەرێمی کوردستان لە شەش مانگی ڕابووردودا زیاتر لە 80 هەزار ئۆتۆمبیل و پتر لە 271 هەزار تۆن کەلوپەل، هاوردەی هەرێمی کوردستان کراوە.
31ـی تەمموزی 2024، وەزارەتی بازرگانی و پیشەسازیی حکوومەتی هەرێمی کوردستان پوختەی ئاماری کار و چالاکی بەڕێوەبەرایەتییەکانی بەڕێوەبەرایەتیی گشتیی بازرگانی، لە ماوەی شەش مانگی ڕابردوو بڵاوکردەوە.
یەکەم/ بەڕێوەبەرایەتیی پێشانگە و خزمەتگوزارییە بازرگانییەکان، بەرپرسیارە لە پێدانی مۆڵەتی هاوردە و هەناردەکردن لە هەرێمی کوردستان کە لە ڕێگەی دەروازە سنورییەکانی، ئیبراهیم خەلیل، حاجی ئۆمەران، پەروێزخان، باشماخ و هەردوو فڕۆکەخانەی نێودەوڵەتیی هەولێر و سلێمانییەوە ئاڵوگۆڕ کراون.
کۆی گشتیی ئۆتۆمبێلی هاوردەکراو (80٫399) ئۆتۆمبیل لەڕێی پێدانی (457) مۆڵەتەوە هاتووە.
هەروەها کۆی گشتیی کەلوپەل و کاڵای تر (271٫378) تۆن و (7٫531٫049) کغم بوە بە بەهای (3٫220٫060٫000) دۆلار هاوردەکراون لە ڕێی (1٫802) مۆڵەتەوە.
کۆی گشتیی کەلوپەلی هەناردەکراو (55٫672) تۆن و (52٫994) کغم بووە لەڕێی (96) مۆڵەتی هەناردەکردن نێردراون.
کۆی گشتیی پێدانی ناسنامەی بازرگانی (2٫898) کە ئەم ناسنامانە دەدرێتە ئەوکەسانەی بەڕێوەبەری ڕێگەپێدراوی کۆمپانیای بواری هاوردەوهەناردەکردنن، خاوەن کارگەو خاوەن پرۆژەی بازگرانی و پیشەسازین.
دووەم/ بەڕێوەبەرایەتیی چاودێریی بازرگانی لە هەولێر، سلێمانی، دهۆک، ئیدارەسەربەخۆکان لەڕێگەی تیمی مەیدانی چاودێریی نرخی کاڵاو دۆخی بازاڕ و پرۆژەبازرگانییەکان دەکات.
کۆی گشتیی سەردانەکان (26٫249) سەردان. سەرپێچی تۆمارکراو(1٫728) سەرپێچی تۆمارکراوە و سزای (143) شوێنکار دراوە هەروەها (106) شوێن کاریش داخراون. بڕی (267٫197) تۆن خۆراکی ماوەبەسەرچوو دەستی بەسەرداگیراوە. بڕی پارەی پسوولەی سزاکانیش بریتیەلە (227٫436٫200) دینار.
سێیەم/ بەڕێوەبەرایەتیی دروستکراوی دانەوێڵە، لە شارەکانی هەولێر، دهۆک، سلێمانی کارەکانی بریتییە لە وەرگرتنی گەنم لەکۆمپانیای بازرگانی دانەوێڵە و دروستکردنی ئارد و دابەشکردنی بەسەر نزیکەی (3000) بریکار کە لەم ساڵدا پێنج بەشە ئارد دابەشکراوە و هەروەها پێدانی مۆڵەت بەنانەواخانە و سەمونخانەکان کە:
پێدانی مۆڵەتی سەموونخانە (18)
مۆڵەتی نانەواخانە (62)
هەروەها کۆی گشتی سەمونخانەی تۆمارکراو (1798) سەمونخانەیە و نانەواخانەکان (2٫855) و شوێنکاری شیرینەمەنی (337) شیرینیخانەیە کە مۆڵەتیان پێدراوە و تۆمارن.
چوارەم/ بەڕێوەبەرایەتیی بازرگانیی دانەوێڵە لەهەولێر و سلێمانی و دهۆک بە گشتی سەرپەرشتیی پرۆسەی وەرگرتنی گەنمی جوتیاران دەکات لە هەریەکە لە سایلۆکانی حکوومەت کە لەگەڵ کۆمپانیای بازرگانی دانەوێڵەی سەر بە حکوومەتی فیدراڵ گرێ دراون ئەوانیش بریتین لە سایلۆکانی:
(هەولێر، قوشتەپە) لە هەولێر
(پیرەمەگرون، چەمچەماڵ، ڕاپەڕین، سەیدسادق، کەلار، بنکەی هەڵەبجە) لە سلێمانی
(فایدە، شێخان، زاخۆ) لە دهۆک
کە تێکڕا توانای ئەمباری سایلۆکان (485000) تۆن دەبێت و لە وەرزی بەبازاڕکردنی گەنمی ئەمساڵ (685٫974٫940 ) هەزار تۆن گەنم وەرگیراوە.
پێنجەم/ بەڕێوەبەرایەتیی پسوولەی خۆراک کاری ڕێکخستن و لادان و زیادکردنی ژمارەی دانیشتوان و ئەندامانی خێزانە بۆ سەر پسوولەی خۆراک.
لە هەولێر و سلێمانی و دهۆک بەڕێوەبەرایەتییەکان ڕۆژانە مامەڵەی هاوڵاتیان بەڕێ دەکەن.
کۆی گشتی ژمارەی خێزانی تۆمارکراو (1٫305٫373) خێزان
کە (5٫348٫233) هاووڵاتی و (3٫266) منداڵ لەخۆدەگرێت.
شەشەم/ بەڕێوەبەرایەتیی بازرگانی کەلوپەلی خۆراک، سەرپەرشتیی کاری دابەشکردنی بەشە خۆراکی مانگانەی هاوڵاتیان دەکات لەڕێگەی (6٫524) بریکار کەتائێستا تۆمارن و لەم ساڵدا تەنها (13) بریکارنامەی خۆراک بەخشراوە، بۆ ئەمساڵ چوار بەشەخۆراک نێردراوە و دابەش کراوە.
