چوارەمین فێستیڤاڵی فیلمی کوردیی مۆسکۆ بە هاوکاری میدیایی کوردستان24 بەڕێوەدەچێت

K24 – مۆسکۆ:

چوارەمین وەشانی فێستیڤاڵی فیلمی کوردیی مۆسکۆ بە هاوکاری میدیایی دامەزراوەی کوردستان24 بەڕێوەدەچێت.

وابڕیارە ڕۆژی 18 تاوەکوو 22ـی ئەیلوولی 2024، چوارەمین وەشانی فێستیڤاڵی فیلمی کوردیی مۆسکۆ، لە پایتەختی ڕووسیا بەڕێوەبچێت.

گولیزار گەردەنزەری بەڕێوەبەری فێستیڤاڵ تایبەت بۆ کوردستان24 ڕایگەیاند، بۆ چوارەمین خولی فێستیڤاڵ، لە فیلمە درێژەکان، حەوت فیلم و هەشت بەڵگەفیلم هەڵبژێردراون، هەروەها لە کورتەفیلمیش، 14 فیلم و نۆ بەڵگەفیلم دەستنیشانکراون.

گەردەنزەری ئەوەشی خستەروو، کە فێستیڤاڵی ئەمساڵ، سەرنج دەخاتە سەر گفتوگۆی نێوان کولتوورەکان و هاوئاهەنگی لەگەڵ ڕووسیادا.

بەدرێژەدان بە نەریتی ساڵانی پێشوو، لە چوارچێوەی ئاڵوگۆڕی کولتووری، فێستیڤاڵەکە جارێکی دیکە سینەماکاران و هەوادارانی سینەما لە تەواوی جیهانەوە کۆدەکاتەوە بۆ نمایشکردنی شاکارە ڕاستەقینەکانی سینەمای کوردی.

بەڕێوەبەری فێستیڤاڵەکە گووتیشی، فیلمەکان لە 12 وڵاتی جیهانەوە، لەوانە کوردستان، عێراق، تورکیا، ئێران، فەرەنسا، سووریا، کەنەدا، هۆڵەندا و چەند وڵاتێکی دیکە لە فێستیڤاڵەکەدا بەشدارن.

گولیزاری ئەوەشی خستەروو، کە ئەمساڵ سەرنجی وردی خستووەتە سەر فیلمەکانی تایبەت بە ئێزدییەکان و ئایینی دێرینی میزۆپۆتامیا و ئەم چەمکە لە پۆستەری فێستیڤاڵەکە ڕەنگی داوەتەوە و ناوەڕاستی پۆستەرەکە، پەڕی تاوسە، کە هێمایەکی بەهێزە بۆ گەلی کورد، بەتایبەت لە چوارچێوەی ئایینی ئێزدیدا کە ئایینێکی دێرینی کوردە و ئەمەش تیشک دەخاتە سەر گرنگی پاراستن و پێشخستنی کولتووری کورد لە رێگەی سینەماوە.

هەروەها باکگراوندەکەی ئەو باڵاپۆشانە دەهێنتەوە یاد کە ئافرەتانی کورد بەشێوەیەکی نەریتی دەیپۆشن. ئەم هێمایە جەخت لەسەر پەیوەندی لەگەڵ کولتوور و نەریتەکان دەکاتەوە، کە لە نەوەیەکەوە بۆ نەوەیەکی دیکە دەگوازرێنەوە، ئەمانەش قسەی گولیزار گەردەنزەری بەڕێوەبەری فێستیڤاڵەکە بوون.

یەکەمین وەشانی فێستیڤاڵی فیلمی کوردیی مۆسکۆ، لە ساڵی 2021 بە  هاوکاری میدیایی دامەزراوەی کوردستان24 بەڕێوەچوو. هەروەها بۆ خولی دووەم و سێیەمی فێستیڤاڵەکەش، دامەزراوەی کوردستان24 هاوکاری میدیایی فێستیڤاڵەکەی کرد.

کوردستان24 بەشێوەیەکی دروست و بابەتیانە و بەپێی پڕەنسیپی بەرپرسیاریەتی کۆمەڵایەتی، ئەمساڵیش ڕووماڵی کار و چالاکییەکانی چوارەمین وەشانی فێستیڤاڵی فیلمی کوردیی مۆسکۆ دەکات.