دووكه‌ڵی كانه‌ كبریت و گێڵگه‌ نه‌وتییه‌كانی گه‌یاره‌ له‌ بۆشایی ئاسمانه‌وه‌ ده‌بینرێت

K24 – هه‌ولێر:

چه‌كدارانی داعش كێڵگه‌ی نه‌وت و كانه‌ كبریته‌كانی ده‌وروبه‌ری گه‌یاره‌ی گڕ تێبه‌رداوه‌ و سه‌ربازێكی ئه‌مریكی وێنه‌ی ئه‌و ئاگر و دوكه‌ڵه‌ زۆره‌ی گرتووه‌ و هه‌واڵه‌كه‌ی به‌ وێنه‌ پشتڕاست كردووه‌ته‌وه‌.

ئه‌و ناوچه‌یه‌ی داعش كێڵگه‌ی نه‌وت و كانه‌ كبریته‌كانی ئاگرداوه‌"40" كیلۆمه‌تر ده‌كه‌وێته‌ خوارووی شاری موسڵه‌وه‌ كه‌ مۆڵگه‌ی سه‌ره‌كی چه‌كدارانی داعشه‌ له‌ عێراق و له‌ ئێستادا له‌ لایه‌ن هێزه‌ عێراقییه‌كان و هێزه‌كانی پێشمه‌رگه‌ی كوردستانه‌وه‌ ئۆپه‌راسیۆن له‌ ده‌وروبه‌ری شاره‌كه‌دا به‌ڕێوه‌ده‌چێت بۆ كۆنترۆڵكردنه‌وه‌ی موسڵ و ده‌رهێنانی له‌ ده‌ست چه‌كدارانی داعش.

ئامانجی داعش له‌ سوتاندنی ئه‌و كێڵه‌گه‌ نه‌وتی و كانه‌ كبریتیانه‌ رێگه‌ گرتنه‌ له‌ پێشڕه‌وی هێزه‌ عێراقییه‌كان و هێزه‌كانی پێشمه‌رگه‌ كه‌ به‌ره‌و شاری موسل له‌ پێشڕه‌ویدان و هه‌روه‌ها رێگه‌ گرتن له‌ بۆردوومانی فڕۆكه‌ عێراقی و فڕۆكه‌كانی هاوپه‌یمانانه‌.

به‌ گوێره‌ی رۆژنامه‌ی "بیزنس ئینسایده‌ر" ی ئه‌مریكی ئاگر و دووكه‌ڵه‌كه‌ به‌ ئه‌ندازه‌یه‌كه‌ ئاژانسی بۆشاییگه‌ریی ئه‌مریكی"ناسا" له‌ ئاسمانه‌وه‌ بینوویه‌تی كه‌ دووكه‌ڵی ئاگره‌كه‌ بڵاو ده‌بێته‌وه‌ و ئاسمانی چه‌ند وڵاتێكی دراوسێی عێراقیشی گرتووه‌ته‌وه‌،له‌ كاتێكدا خه‌ڵكانی سڤیل و سه‌ربازه‌كان له‌ ته‌نیشتییه‌وه‌ن و ئه‌و دووكه‌ڵه‌ ده‌چێت به‌ گه‌روویاندا.

بیل دانكان ئه‌و سه‌ربازه‌ ئه‌مریكییه‌ی وێنه‌كانی گرتووه‌ له‌ بنكه‌یه‌كی سه‌ربازی ئه‌مریكاوه‌

هه‌ر چه‌نده‌ ئه‌مریكا به‌ رێگه‌ی زه‌مینی به‌شداری له‌ پرۆسه‌ی رزگاركردنی موسڵ ناكات،به‌ڵام ژماره‌یه‌ك سه‌رباز و راوێژكاری له‌ مه‌یدانه‌كانی شه‌ڕدان و هاوكاری هێزه‌ عێراقییه‌كان ده‌كه‌ن،یه‌كێك له‌و سه‌ربازه‌ ئه‌مریكییانه‌ به‌ ناوی "بیل دانكان" له‌ بنكه‌كه‌ی خۆیه‌وه‌ ژماره‌یه‌ك وێنه‌ی  ئه‌و دووكه‌ڵه‌ خه‌سته‌ی گرتووه‌ و له‌سه‌ر پێگه‌ی "ناشناڵ جیوگرافیك" بڵاویكردووه‌ته‌وه‌ و له‌ سه‌ر وێنه‌كانی نوسیووه‌"لێره‌ رۆژ له‌ ناو دووكه‌ڵه‌ چڕه‌كانه‌وه‌ هه‌ڵدێت و ژینگه‌ی ناوچه‌كه‌ له‌ به‌رده‌م هه‌ڕه‌شه‌یه‌كی گه‌وره‌دایه‌ و دوور نییه‌ ژینگه‌كه‌ بگۆڕێت.

ئه‌و سه‌ربازه‌ هیچ كۆمێنتێكی له‌سه‌ر ره‌وشی خۆی له‌و ناوچه‌یه‌ نه‌نوسیووه‌ به‌ڵكو چه‌ند وێنه‌یه‌كی گرتووه‌ كه‌ خراپی دۆخی ژینگه‌ی ناوچه‌كه‌ نیشان ده‌دات و ته‌نانه‌ت له‌ ئاسمانیشه‌وه‌ ناسا وێنه‌ی ئه‌و دووكه‌ڵه‌ی گرتووه‌ كه‌ به‌ روونی ده‌بینرێت.

چونكه‌ ئه‌و جۆره‌ دووكه‌ڵه‌ چه‌ند گازێكی زیانبه‌خش به‌رهه‌م ده‌هێنێت وه‌ك "دووه‌م ئۆكسیدی كبریت" له‌و كاته‌ی كه‌ش و هه‌وا ته‌ڕ بێت كاریگه‌ری له‌ سه‌ر پێست و بۆری هه‌ناسه‌دانی مرۆڤ دروست ده‌كات و ده‌گۆڕێت بۆ ترشه‌ڵۆكی كبریت و سه‌ره‌نجام زیان به‌ مرۆڤ و خاك ده‌گه‌یه‌نێت.