ئاگادارییەک لە وەزارەتی شەهیدانی حکوومەتی هەرێمی کوردستان

K24 - هه‌ولێر:

وەزارەتی شەهیدان و ئەنفالکراوەکانی حکوومەتی هه‌رێمی کوردستان داوا لە سەرجەم ناوەندەکانی خوێندن دەکات کە بە مەبەستی خەرجکردنی تێچووی خوێندنی هاوسەر و کوڕان و کچانی شەهیدان و زیندانیان سیاسی، لیستی ناوەکان پێشکەش بە وەزارەت بکەن.

له‌ ئاگادارینامه‌یه‌كدا، كه‌ وێنه‌یه‌كی ده‌ست كوردستان 24 كه‌وتووه‌، بەڕێوەبەرایەتی گشتی خزمەتگوزاری و کۆمەڵایەتی سەر بە وەزارەتی کاروباری شەهیدان و ئەنفالکراوەکان لە رێگەی کەناڵەکانی راگەیاندن (بینراو و بیستراو) ئاگاداری سەرجەم زانکۆ و پەیمانگا و قوتابخانە و فێرگەی (ئەهلی و حکوومی)یه‌كان دەکات لە هەرێمی کوردستان کە هاوسەر و کوڕ و کچی شەهیدان و ئەنفالکراوەکان و زیندانی سیاسی یان یەکیک لە منداڵەکانیان لە قوتابخانە و خوێندنگاکان بەردەوامن لە خوێندن بۆ ساڵی خوێندنی (‎2016 -2017) کە لە ماوەی 15 رۆژدا لیستی ناوەکانی خوێندکاران و قوتابیان بنێرن بۆ مەبەستی خەرجکردنەوەی خەرجی خوێندن بۆیان بە پێی فۆڕمی هاوپێچ کراوان.

به‌ گوێره‌ی ئاگادارینامه‌كه‌، بە پێچەوانەوە خۆیان بەرپرسیار دەبن لە دواکه‌وتنی ناوەکانیان لە بەڕێوەبەرایەتییە گشتییەکانی  هەولێر- سلێمانی - دهۆک - هەڵەبجە -  گەرمیان و کەرکووک، دەبێت بۆ زیندانیانی سیاسی لە رێگەی بەڕێوەبەرایەتی زیندانییە سیاسییەکان دەبێت.