زیانەكانی تەقینەوەی كۆگاكەی تاسڵووجە ئاشكرا دەكرێت
"چوار پێشمەرگە برینداربوون"
K24 - سلێمانی
دوای ئەوەی شەوی رابردوو كۆگایەكی چەك و تەقەمەنی لە تاسڵووجەی نزیك سلێمانی تەقییەوە، فەرماندەیی ھێزەكانی 70 پێشمەرگە ئاشكرای دەكات چوار پێشمەرگە لە رووداوەكە برینداربوونە و لێكۆڵینەوە لە رووداوەكە بەردەوامە. لیژنەی كاروباری پێشمەرگە لەپەرلەمانی كوردستان ئاشكرای دەكات، لەسەر تەقینەوەی كۆگاكانی چەك و تەقەمەنی لە ھەرێمی كوردستان بانگێشتی وەزارەتی پێشمەرگەیان كردووە و لێكۆڵینەوە دەكەن.
لە راگەیەندراوێكدا فەرماندەیی ھێزەكانی 70 پێشمەرگە رایگەیاند: "كاتژمێر 10:20 خولەكی شەوی رابردوو 2/7/2018 ئاگرێك لە كۆگایەكی ھێزەكانی 70 لە نزیك تاسڵووجە كەوتەوە، بۆ ماوەی سێ كاتژمێر تەقینەوە لە كۆگاكەدا بەردەوام بوو، بەو ھۆیەوە زیانی مادی لێكەوتەوە و چوار پێشمەرگەش بە سوكی برینداربوون، كە ئێستا باری تەندروستیان جێگیرە، لێكۆڵینەوە لە ھۆكاری كەوتنەوەی ئاگرەكە و دیاریكردنی زیانەكان بەردەوامە. لە دوای تەواوبوونی لێكۆڵینەوە، زانیاری لەسەر ئەو رووداوە بڵاودەكەینەوە".
لیژنەی كاروباری پێشمەرگە لەپەرلەمانی كوردستان ئاشكرای دەكات، لەسەر تەقینەوەی كۆگاكانی چەك و تەقەمەنی لە ھەرێمی كوردستان بانگێشتی وەزارەتی پێشمەرگەیان كردووە و لە ھۆكاری تەقینەوەكان دەكۆڵنەوە.
شیلان شێخ جەعفەر، سەرۆكی لیژنەی كاروباری پێشمەرگە و شەھیدان لە پەرلەمان بە كوردستان24 راگەیاند: "داوای روونكردنەوەمان لە وەزارەتی پێشمەرگە كردووە و ئەوان لیژنەیەكیان بۆ بەدواداچوون پێكھێناوە، بەڵام لیژنەی كاروباری پێشمەرگە لەپەرلەمانی كوردستانی تێدا نییە، لە كاتێكدا دەبوو لیژنەكە ھاوبەشی بووایە".
ھ.م