تیمە تەندروستییەکانى چەمچەماڵ ژماره‌یه‌ك دوكانییان داخست

K24 - چه‌مچه‌ماڵ:

تیمە تەندروستییەکان لەقەزای چەمچەماڵ زیاتر لە 20 دوکان دادەخـەن و 62 دوکانی دیكه‌ش غـەرامـەدەکەن وە نزیکەی 250 شوێن بۆ دواجار ئاگاداردەکەنەوە.

راگه‌یاندنی به‌ڕێوه‌به‌رایه‌تی ته‌ندرووستی چه‌مچه‌ماڵ بڵاویكرده‌وه‌، لە مانگی (1 تاکو 10)ى ئەمساڵدا بەشی چاودێری تەندروستی نـاو مەڵبەندى ته‌ندرووستی چه‌مچه‌ماڵ و تیمە تەندروستیيەکان لە 173 گەڕان و دەرچووندا بۆ ناو بازاڕ و شوێنە گشتیيەکان 1909 شوێنیان بەمەبەستی پشکنین و پێدانی رێنمایيە تەندروستيیەکان  بەسەرکردووه‌تەوە .

هه‌ر به‌ گوێره‌ی ئاماره‌كان، دوائاگادارییان به‌  248 شوێنی دیكه‌داوه‌ بۆ پابه‌ندبوون به‌ رێنماییه‌كان، هه‌روه‌ها توانیویانە لەو ماوەیەدا بە هاوکاری بەشی ده‌زگا ئه‌منییه‌كان، دەستبگرن بەسەر بڕی 30 هه‌زار و 565 کگم كه‌لوپه‌لی بەسەرچوو.

لـەو ئامارەدا ژمارەی ئەو دوکانانەی کە بەهۆی پابەندنەبوون بەرێنمایيەکان و سەرپێچییەوە داخراون 22 دوکانە، 62 دوکانی دیكه‌ش غەرامەکراون، هاوكات 947 مۆڵەتنامە و ناسنامەی تەندروستی لەو ماوەیەدا بەخشراوە و نوێکراوەتەوە.

به‌ گوێره‌ی رایگه‌یاندنی ته‌ندرووستی چه‌مچه‌ماڵ، له‌و 10 مانگه‌ی رابردوو، بۆ بڵاوكردنه‌وه‌ی  هۆشياری تەندروستی, 36 کۆبوونەوە لەگەڵ پیشەوەران و دەزگـا و دامـەزراوە جیاجیاکان کراوە، هه‌روه‌ها 544 پشکنینی (G.S.E) و هەوکردنی جگەری ڤایرۆسی بۆ پیشەوەران ئەنجامدراوە.

لەبەشێکی تری ئامارەکەی مەڵبەندی خۆپاراستندا  ئیشوکارو چـالاکییەکانی یەکەی پشکنینی خۆراکی بانی مەقانی تێدایە و کەلەو 10 مانگەدا لەلایەن کارمەندەکانی ئه‌و یەکەیەوە توانراوە پشکنین بۆ 1739 بار بکرێت کە دەکاتە زیاتر لە 7 هەزار تۆن، لەبەر نەبوونی مەرجە تەندروستیيەکانیش 80 باری تر رێگەی پێ نەدراوە هاوردەی بازاڕەکان بکرێت و گەڕێنراوەتەوەزیاتر لە 4 هەزار تۆنە.