بارانبارین دەست پێدەكاتەوە

K24 - ھەولێر

بەپێی پێشبینیەكانی كەشناسی شەپۆلێكی بارانبارین ھەرێمی كوردستان دەگرێتەوە و چەند رۆژێك بەردەوام دەبێت و لە ھەندێك ناوچە بارانی بە لێزمە و لە ناوچە شاخاوییەكانیش بەفر دەبێت.

بەپێی راپۆرتی پێشبینیەكانی بەڕێوەبەرایەتی كەشناسی و بومەلەرزەزانی ھەرێمی كوردستان، لە ئەمڕۆوە ھەرێمی كوردستان دەكەوێتە ژێری كاریگەری نزمە پاڵەپەستۆی دەریای ناوەڕاست و لە سبەی رۆژی ھەینییەوە شەپۆلەكە كار دەكاتە سەر تەواوی ناوچەكانی ھەرێمی كوردستان و ئاستی بارانبارین مامناوەندی دەبێت و لە ھەندێك ناوچەی شاخاوی لێزمە باران دەبێت و لە ناوچە شاخاوییە بەرزەكانیش ئەگەری بەفربارین ھەیە.

كەشناسی راشیگەیاندووە، لەكاتی ھاتنی ئەم شەپۆلە بارستە ھەوایەكی نیمچە ساردیش روو لە ناوچەكە دەكات و پلەكانی گەرما نزم دەبێتەوە و ھەندێك جاریش ھەورە تریشقە دەبێت. پێشبینی دەكرێت لە سەنتەری پارێزگاكان 25 ملیم باران ببارێت.

بەڕێوەبەرایەتی كەشناسی ئاماژەی بەوەشداوە، ئەو شەپۆلە بارانبارینە تا رۆژی یەكشەممە كاریگەری لەسەر ناوچەكە دەبێت.