هۆڵەندا لە هاوکاریکردنی کوردستان و پێشمەرگە بەردەوام دەبێت

K24 – هه‌ولێر:

ئەمڕۆ 18/12/2018 نێچیرڤان بارزانی، سەرۆك وەزیرانی ھەرێمی كوردستان و ستیڤ بلۆك، وه‌زيرى ده‌ره‌وه‌ى هۆڵه‌ندا كۆبوونەوەی لە كۆنگرەیەكی رۆژنامەوانیدا ناوەرۆكی كۆبوونەوەكەیان خستەڕوو.

نێچیرڤانی بارزانی لەبارەی کۆبوونەوەکە رایگەیاند: "باسی هاوکاری هۆڵەندا بۆ هەرێمی کوردستان کرا، بەتایبەت هاوکارییەکانی ئەو وڵاتە لە شەڕی داعش و رەوشی ئاوارەکان".

لای خۆیەوە ستیڤ بلۆک، رایگەیاند، ئەوان پەیوەندییەکانی زۆر باشیان لەگەڵ هەرێمی کوردستان هەیە و گرنگی زیاتری پێدەدەن.

ئاشکراشیکرد: "زیاد لە سێ هەزار ئاوارەی کورد لە هۆڵەندا دەژین".

سەرۆکی حکومەتی هەرێم داوای کرد ، هۆڵەندا یارمەتی زیاتری کوردستان بدات لە گشت بوارەکان بە تایبەت لە رووی کشتووکاڵ و بازرگانییەوە.

وەزیری دەرەوەی هۆڵەندا گووتی: "ھاوكاری ھێزی پێشمەرگەمان كردووە و ھاوكارییە سەربازییەكانمان بۆ ھێزی پێشمەرگە بەردەوام دەبن و دەمانەوێت ھەرێمی كوردستان ھەرێمێكی بەھێزبێت و پەیوەندییەكانمان بەھێزتربن".

هەر لەو کۆبوونەوەیە، باس لە پێکهێنانی حکومەتی هەرێمی کوردستان و عێراق کراوە و هەردوولا کۆک بوون کە پەیوەندی بەهێزی هەردوولا بەردەوام بێت.