كەشناسی: لە ھەندێك ناوچە بارانی بە لێزمە دەبێت

K24 - ھەولێر

بە گوێرەی پێشبینیەكانی كەشناسی ئەمڕۆ شەپۆلێكی بارانبارین ھەرێمی كوردستان دەگرێتەوە و چەند رۆژێك بەردەوام دەبێت.

بەڕێوەبەرایەتی كەشناسی و بومەلەرزەزانی ھەرێمی كوردستان، پێشبینیەكانی بۆ كەشوھەوای 48 كاتژمێری داھاتوو بڵاوكردەوە، بەپێی پێشبینیەكان ئەمڕۆ ئاسمانی ھەرێمی كوردستان لە ساماڵ و پەڵە ھەورەوە دەگۆڕێت بۆ ھەوری تەواو بارانبارین دەست پێدەكات، لە كاتەكانی شەودا رێژەی بارانبارین زیاتر دەبێت.

كەشناسی لەبارەی كەشوھەوای سبەی پێشبینی دەكات، رۆژی ھەینی ئاسمانی ھەرێمی كوردستان ھەور و باران دەبێت، لە كاتەكانی ئێوارەدا رێژەی بارانبارین زیاتر دەبێت و لە ھەندێك ناوچەی شاخاوی لێزمە باران دەبێت.