توركیا وەڵامی ھێرشەكەی سووریای دایەوە

K24 - ھەولێر

K24 - ھەولێر

سەرۆك كۆماری توركیا رایگەیاند، لە وەڵامی ھێرشەكانی سووریا بۆسەر ھێزەكانیان لە ئیدلب 222 مووشەكیان ئاراستەی سووریا كردووە و 35 سەربازی ئەو وڵاتەیان كوشتووە. دەشڵێ، ئەگەر پێویست بكات فڕۆكەی ئێف16 بەكاردەھێنن.

رەجەب تەیب ئەردۆغان، سەرۆك كۆماری توركیا لە كۆنفرانسێكی رۆژنامەوانیدا رایگەیاند: "ئۆپەراسیونەكەمان لە ئیدلب بەردەوام دەبێت و لە وەڵامی ھێرشەكەی ئەمڕۆدا 222 مووشەكمان ئاراستەی سووریا كردووە و 35 سەربازی ئەو وڵاتەمان كوشتووە".

ئەردۆغان گوتیشی: "ئەگەر پێویست بكات فڕۆكەی ئێف16 لە ھێرشەكانمان بەكاردەھێنین".

سەرۆك كۆماری توركیا ئەوەشی خستەڕوو: "نابێ رووسیا بەربەست بۆ ھێرشەكانمان لە سووریا دروست بكات".

وەزارەتی بەرگری توركیا لە راگەیەندراوێكدا ئاشكرای كرد، له‌ ئاكامی تۆپبارانی سه‌ختی هێزه‌كانی رژێمی به‌شار ئه‌سه‌د له‌ ئیدلب چوار سه‌ربازی توركیا كوژراون و 9ی دیكەش بریندار بوون كه‌ برینی یه‌كێكیان سه‌خته‌.

ئاشكراشی كرد "دوای ده‌ستنیشانكردنی ئامانجه‌كان دەستبەجێ به‌ چڕی وه‌ڵامی پێویست دراوه‌ته‌وه‌ و ئامانجه‌كان خاپوور كران. چاودێری پێشهاته‌كان ده‌كرێت و رێوشوێنی پێویست ده‌گیرێته‌ به‌ر".

ھ.م