کۆمیسیۆن ڕێژەی بەشداریکردن لە دەنگدانی تایبەت ڕادەگەیەنێت

بەرپرسی هەڵبژاردنەکانی کوردستان لە کۆمیسیۆنی عێراق دەڵێت: ئەم هەڵبژاردنە بە شێوەیەکی زۆر سەرکەوتوو بەڕێوە چوو و ئامێرەکانیش بە شێوەیەکی باش کاریان کرد. گوتیشی: سکاڵا تۆمار کراوە، بەڵام تا ئێستا ڕێژەکە دیار نییە کە چەندە.

هەینی 18ـی تشرینی یەکەمی 2024، نەبەرد عومەر، بەرپرسی هەڵبژاردنەکانی کوردستان لە کۆمیسیۆنی باڵای سەربەخۆی هەڵبژاردنەکانی عێراق، لە کۆنفرانسێکی ڕۆژانەمەوانیدا، ڕایگەیاند: پرۆسەی دەنگدان بە شێوەکەی زۆر سەرکەوتوو بەڕێوەچوو، هەروەها ئەنجامەکان بە سەرکەوتوویی نێردرا بۆ بەغدا و هیچ کێشە و گرفتێکمان نەبوو.

بەرپرسی هەڵبژاردنەکانی کوردستان لە کۆمیسیۆنی عێراق، ئاماژەی بەوە دا، ئەم هەڵبژاردنە زۆر بە سەرکەوتوویی بەڕێوەچوو، هەروەها ئامێرەکانیش بە شێوەکەی باش کاریان دەکرد و کێشەیان نەبوو.

باسی لەوە کرد، نزیکەی سێ هەزار و 750 چاودێری نێودەوڵەتی و هەزار و 928 چاودێری ناوخۆیش ئامادەبوون لە هەموو بنکەکانی دەنگدان. نەبەر عومەر، گوتی: سکاڵا تۆمار کراوە، بەڵام تا ئێستا ڕێژەکە دیار نییە چەندە.

لەبارەی کێشەی پەنجەی مۆر، بەرپرسی هەڵبژاردنەکانی کوردستان لە کۆمیسیۆنی عێراق، ڕوونیکردەوە، دوو جۆر کێشەی پەنجەمۆر هەیە. یەکەمیان؛ کارتی دەنگدان پەنجەمۆری تێدا نەبێت. دووەمیان؛ پەنجەمۆر هەیە لە ناو کارتەکە بەڵام لە ڕۆژی هەڵبژاردن کەسەکە بەهۆی نەخۆشیەوە یان زامدار بوونی پەنجەی، پەنجەمۆرەکەی ناخوێنێتەوە.

هاوکات داواکارە لە هاووڵاتییان، کە گرنگی بە پەنجەیان بدەن و تا کاتی دەنگدان، چونکە ئەگەر پەنجەمۆریان نەخوێنێتەوە ناتوانن دەنگ بدەن.

لای خۆیەوە دکتۆر ئەیسەر، گوتەبێژی کۆمیسیۆن، ڕێژەی بەشداربووانی لە هەموو پارێزگاکانی هەرێمی کوردستان و بەشێک لە پارێزگاکانی عێراق ڕاگەیاند و بەم شێوەیە بوون:

دهۆک: 98% 

هەولێر: 97% 

سلێمانی: 97% 

هەڵەبجە: 96% 

کەرکووک: 56% 

نەینەوا: 43%

دیالە: 62% 

بەغدا کەرخ: 79% 

بەغدا ڕەسافە: 60%

سەڵاحەددین: 54%

ئەنبار: 8%

واست: 4% 

ناوبراو ئاشکرای کرد، لە کۆی 215 هەزار و 560 دەنگدەری تایبەت، 208 هەزار و 521 کەس دەنگیان داوە، رێژەی گشتی بەشداریکردن لە دەنگدان %97 بوو.

کاتژمێر 7ـی بەیانیی ئەمڕۆ هەینی 18ـی تشرینی یەکەمی 2024، پرۆسەی دەنگدانی تایبەتی هێزە ئەمنییەکان بۆ هەڵبژاردنی خولی شەشەمی پەرلەمانی کوردستان دەستی پێ رد و تاکو کاتژمێر 06:00ـی ئێوارە بەردەوام دەبێت.

لە بازنەی هەولێر بۆ دەنگدانی تایبەت ( 48 ) بنكەى دەنگدان دیاریکراوە و لە ئیدارەى سەربەخۆى سۆرانیش 14 بنكە، ( 82 هەزار و 470 ) ده‌نگدەر بایۆمەتری کردووە و ( 82 هەزار و 88 ) دەنگدەر کارتی بایۆمەترى وەرگرتۆتەوە و دەنگ دەدەن.

هەروەها رۆژی یەکشەممەی داهاتوو، 20ـی تشرینی یەکەمی 2024، هەڵبژاردنی گشتیی خولی شەشەمی پەرلەمانی کوردستان بەڕێوە دەچێت، کۆمسیونى باڵاى سەربەخۆى هەڵبژاردنەکانی عێراقیش ڕایگەیاندووە، 24 کاتژمێر دوای تەواوبوونی پرۆسەکە، ئەنجامی بەرایی هەڵبژاردن ڕادەگەیەنێت.