دووەم ڕۆژی پرۆسەی سەرژمێریی دانیشتووانی عێراق و هەرێمی کوردستان دەستی پێ کرد

پێنجشەممە، 21ـی تشرینی دووەمی 2024، دووەم ڕۆژی پرۆسەی سەرژمێریی دانیشتووان لە عێراق و هەرێمی کوردستان دەست پێ دەکات.

جێگای باسە دوێنێ چوارشەممە، کە یەکەم ڕۆژی پرۆسەکە بوو، ڕێژەی بەشداریی دانیشتتووانی هەولێر لە پرۆسەی سەرژمێری 60%ـی تێپەڕاند، هاوکات چاوەڕێ دەکرێت، ئەمڕۆ ڕێژەی بەشداریی دانیشتووان لە پرۆسەی سەرژمێریدا بگاتە 100%.

لە پرۆسەی سەرژمێریی گشتیدا، زیاتر لە 130 هەزار بژمێر بەشدار دەبن و 77 پرسیاری تایبەت بە ژیان و گوزەرانی هاووڵاتییان دەکەن.

سەرژمێریی لە هەر وڵاتێک گرنگی و تایبەتمەندی خۆی هەیە بەو پێیەی لە ڕێگەیەوە دەتوانرێت توانای مرۆیی خەڵک و توانای ماددی و ئاستی خزمەتگوزارییە گشتییەکان بۆ دابینکردنی ژیانێکی باشتر بۆ هاووڵاتییان دیاری بکرێت و حکوومەتیش بەرچاوڕوون بێت لە دارشتنەوەی پلانی ئابووری و سیاسی و مرۆیی. ئەم سەرژمێرییە کە دەستی پێ کرد، فۆرمێکی ئەلیکترۆنی هەیە لە ڕێگەی تابلێتەوە پڕ دەکرێتەوە، کۆمەڵێک خانە لەخۆ دەگرێت وەک ناوی خۆت و کەسوکار و خێزان و هەتا دوای.