ئەڵمانیا 50 ملیۆن یۆرۆ بۆ سووریا تەرخان دەکات
یەکشەممە، 12ـی کانوونی دووەمی 2025، وەزیری دەرەوەی ئەڵمانیا، ئانالینا بێربۆک، ڕایگەیاند، وڵاتەکەی 50 ملیۆن یۆرۆی دیکە بۆ خۆراک و پێداویستییەکانی کەرتی تەندروستیی سووریا دابین دەکات.
ئانالینا بێربۆک، لە کۆنفرانسی هەرێمی دەربارەی سووریا، لە ڕیازی پایتەختی سعوودیە گوتی: "بەرلین پێشنیازی 'ڕێگەیەکی ژیرانە'ـی کردووە بۆ هەڵگرتنی سزاکان تاوەکوو خەڵکی سووریا کەمێک هەست بە ئارامی بکەن."
ئاماژەی بەوەش دا "ئێستا سوورییەکان پێویستیان بەوەیە بەخێرایی سوود لە گواستنەوەی دەسەڵات وەربگرن و ئێمەش بەردەوام دەبین لە یارمەتیدانی ئەوانەی هیچ شتێکیان لە سووریا نییە، وەک چۆن لە ماوەی ساڵانی شەڕی ناوخۆدا کردوومانە." گوتیشی: "50 ملیۆن یۆرۆی دیکە بۆ خۆراک و پێداویستیی پزیشکیی لە سووریا دابین دەکەین."
وەزیری دەرەوەی ئەڵمانیا، جەختی لەوە کردەوە "سزاکانی سەر هاوپەیمانەکانی بەشار ئەسەد، کە لە شەڕی ناوخۆی سووریادا تاوانی گەورەیان کردووە، دەبێت بەردەوام بێت."
