نەتەوە یەکگرتووەکان: ڕۆژئاوای کوردستان تووشی قەیرانی ئاو بووە
گوتەبێژی سکرتێری گشتیی نەتەوە یەکگرتووەکان لە کۆنگرەیەکی ڕۆژنامەوانیدا باس لە قەیرانی ئاو لە ڕۆژئاوای کوردستان دەکات و دەڵێت: ''ژمارەیەکی زۆر لە ئاوارەکان لە کەمپ و گوندەکان بەهۆی شەڕەوە بێئاو بوونە"
ستیفان دوجاریک، گوتەبێژی سکرتێری گشتیی نەتەوە یەکگرتووەکان، سێشەممە 14ی کانوونی دووەمی 2025، لە کۆنگرەیەکی ڕۆژنامەوانی ڕایگەیاند ''بەهۆی شەڕ و ناکۆکییەکانی حەلەب و دەوروبەری، بەنداوی تشرین، نزیک 35 ڕۆژە ئاو و کارەبا بەرهەم ناهێنێت، ئەمەش وای کردووە 403 هەزار کەس لە منبج و کۆبانێ بێئاو بن.
گوتەبێژی سکرتێری گشتیی نەتەوە یەکگرتووەکان گوتیشی: "بەهۆی کەمیی سەرچاوەی ئاو، بەشێکی زۆر لە گوندەکانی سەر بە دێرەزوور قەیرانی ئاویان هەیە."
هەروەها ستیفان دوجاریک ئاماژەشی دا: "ڕێکخراوی تەندروستیی جیهانی، بۆ ماوەی 10 ڕۆژ لە کەمپی هۆڵ لە ڕۆژئاوای کوردستان، ڤاکسینیان لە منداڵان داوە، نوێنەرەکانمان لەوێ بە ئێمەیان ڕاگەیاندووە، هێشتا مەترسی ئاسایش لەوێ هەستی پێ دەکرێت."
