سیاسی

کوەیت ئامادەی پەرەپێدانی پەیوەندییەکانە لەگەڵ هەرێمی کوردستان

کوردستان هەرێمی کوردستان کوەیت مەسرور بارزانی

سەرۆکی حکوومەتی هەرێمی کوردستان سەرۆک وەزیرانی کوەیت کۆبوونەوە و باسیان لە بەهێزکردنی پەیوەندیی دوولایەنە کرد.

سێشەممە 11ـی شوباتی 2025 مەسرور بارزانی، سەرۆکی حکوومەتی هەرێمی کوردستان لە دوبەی، لەگەڵ شێخ ئەحمەد عەبدوڵلا ئەلئەحمەد ئەلسەباح، سەرۆک وەزیرانی کوەیت کۆبووەوە.

لە کۆبوونەوەکەدا کە قوباد تاڵەبانی، جێگری سەرۆکی حکوومەت ئامادەی بوو، سەرۆک وەزیرانی کوەیت سڵاو و ڕێزی شێخ مەشعەل ئەلئەحمەد ئەلجابر ئەلسەباح میری کوەیتی بە سەرۆکی حکوومەت گەیاند و ئامادەیی وڵاتەکەی بۆ پەرەپێدانی پەیوەندییەکان لەگەڵ هەرێمی کوردستان دەربڕی.

هەروەها سەرۆک وەزیرانی کوەیت، سەرۆکی حکومەتی هەرێمی کوردستانی بانگهێشتی کوەیت کرد.

لە کۆبوونەوەکەدا سەرۆکی حکوومەت ئاماژەی بە گرنگیی بەهێزکردنی پەیوەندیی دوولایەنە و برەودان بە هاریکاریی و هەماهەنگیی نێوان هەرێمی کوردستان و دەوڵەتی کوەیت لە بوارە جۆراوجۆرەکان دا..

لە بەشێکیدیکەی کۆبوونەوەکەدا، گفتوگۆیان لەبارەی دۆخی گشتیی عێراق و دوایین گۆڕانکاریی و پێشهاتەکانی ناوچەکە کرد.

 

دووشەممە، 10-02-2025، سەرۆک وەزیران مەسرور بارزانی، بە سەرۆکایەتیی شاندێکی حکوومی، گەیشتە ئیمارات، بۆ بەشداریی لە لووتکەی جیهانیی حکوومەتەکان کە لە دوبەی بەڕێوە دەچێت.

ئەندامانی ئەو شاندەی یاوەریی سەرۆک وەزیران مەسرور بارزانی دەکات بریتین لە: 

1.  قوباد تاڵەبانی، جێگری سەرۆکی حکوومەتی هەرێمی کوردستان. 

2. ساسان عەونی، وەزیری شارەوانی و گەشتوگوزار. 

3.  ئومێد سەباح، سەرۆکی دیوانی ئەنجوومەنی وەزیران. 

4.  ئامانج ڕەحیم، سکرتێری ئەنجوومەنی وەزیران. 

لووتکەی جیهانیی حکوومەتەکان ئەمڕۆ سێشەممە دەستی پێ کرد و تاوەکوو 13ـی ئەم مانگە بەردەوام دەبێت، لووتکەکە لە شاری دوبەی بەڕێوە دەچێت. بڕیارە لە پەراوێزی لووتکەکەدا، سەرۆک وەزیران زنجیرەیەک دیدار و کۆبوونەوە لەگەڵ ژمارەیەک لە سەرۆک و سەرکردە و بەرپرسانی باڵای جیهان بکات.