پۆلیسی هەولێر باندێکی فێڵباز و تەڵەکەباز ئاشکرا دەکات
پۆلیسی هەولێر ڕایدەگەیەنێت، باندێکیان دەستگیرکردووە، نووسینگەیەکی وەهمی وەرگرتنی ڤیزایان داناوە و فێڵیان لە خەڵکی کردووە بەناوی وەرگرتنی ڤیزای دەرەوەی وڵات و پارەی زۆریان لێیان وەرگرتووە.
یەکشەممە 6ـی نیسانی 2025، بەڕێوەبەرایەتی پۆلیسی هەولێر بڵاوی کردەوە، باندێکی چەند کەسیان دەستگیر کردووە، بەتۆمەتی فێڵکردن لە چەندین هاووڵاتی لە ڕێگای دانانی نووسینگەی وەرگرتنی ڤیزا و گەشتوگوزاری وەهمی و ئەکاونتێکی (تیکتۆک)ی وەهمی بەناوەکانی (سۆناس تراڤل) و (ئەترەس تراڤل) لە شاری دهۆک کە گوایە ڤیزای دەرەوەی وڵات بۆ هاووڵاتیان وەردەگرن.
پۆلیسی هەولێر ئاشکرای دەکات، دوای ئەوەی هاووڵاتیان پەیوەندییان پێوە کردوون، چەند جارێک ئەو هاووڵاتیانانەیان لە نزیکەوە بینیوە و پێکەوە مامەڵەیان کردووە، بەڵگەنامە فەرمییەکانیشیان لێ وەرگرتوون، دوایین جاریش ئەو تۆمەتبارانە داوایان کردووە کەوا پارەکانیان بخەنە سەر هەژماری بانکی (FIB)، پاشان لە ڕێگای ئەو ژمارە بانکییەوە هەژمارەکانیان سفر دەکردەوە و کۆی پارەکانیان دەخستە سەر هەژماری خۆیان و دواتریش تەلەفۆنەکانیان دادەخست.
پۆلیسی هەولێر ئاماژەی بەوە کردووە، ئەو باندە کە بەم شێوەیە فێڵیان لە چەندین هاووڵاتی کردووە، خەڵکی شاری دهۆکن، بە هەماهەنگی لەگەڵ بەڕێوەبەرایەتی پۆلیسی پارێزگای دهۆک دەستگیرکراون.
