سیاسی

مەسرور بارزانی: پابەندبوونی خۆمان بە داکۆکیکردن و دابینکردنی مافەکانی کرێکاران دووپات دەکەینەوە

کوردستان

 سەرۆک وەزیران مەسرور بارزانی لە ڕۆژی جیهانیی کرێکاران پابەندبوونی حکوومەت بە داکۆکیکردن و دابینکردنی مافەکانی کرێکاران دووپات دەکاتەوە. 

پێنجشەممە، 1-05-2025، مەسرور بارزانی، سەرۆکی حکوومەتی هەرێمی کوردستان، بە بۆنەی ڕۆژی جیهانیی کرێکاران، پەیامێکی لە تۆڕی کۆمەڵایەتیی ئێکس بڵاو کردەوە. 

سەرۆک وەزیرانی هەرێمی کوردستان بەو بۆنەیەوە "گەرمترین پیرۆزبایی" لە گشت کرێکارانی کوردستان، عێراق و جیهان دەکات و دەڵێت: ڕێز و پێزانینێکی زۆرم بۆ ماندووبوون و ئەرک و بەشداریی کارای كرێكارانی كوردستان لە پرۆسەی ئاوەدانکردنەوە و گەشەپێدان و بنیاتنانی ژێرخانی ئابووریی هەرێمی کوردستاندا هەیە.

بە گوتەی مەسرور بارزانی "حکوومەتی هەرێمی کوردستان، لە ساڵانی ڕابردوودا، هەوڵی زۆری داوە و کاری کردووە لە پێناو باشترکردنی دۆخی ژیانی کرێکاران و پاراستنی مافەکانیان، لەم ڕووەشەوە، پابەندبوونی خۆمان بە داکۆکیکردن و دابینکردنی مافەکانی کرێکاران لە ڕووی تەندروستی و سەلامەتی پیشەیی و مافە یاساییەکان و باشترکردنی هەلومەرجەکانی کارکردنیان دووپات دەکەینەوە."

 

 

دەقی پەیامی سەرۆکی حکومەتی هەرێمی کوردستان بە بۆنەی ڕۆژی جیهانیی کرێکاران:

بە بۆنەی ڕۆژی جیهانیی کرێکاران، گەرمترین پیرۆزبایی لە گشت کرێکارانی کوردستان و عێراق و جیهان دەکەم.

ڕێز و پێزانینێکی زۆرم بۆ ماندووبوون و ئەرک و بەشداریی کارای كرێكارانی كوردستان لە پرۆسەی ئاوەدانکردنەوە و گەشەپێدان و بنیاتنانی ژێرخانی ئابووریی هەرێمی کوردستاندا هەیە.

حکوومەتی هەرێمی کوردستان، لە ساڵانی ڕابردوودا، هەوڵی زۆری داوە و کاری کردووە لە پێناو باشترکردنی دۆخی ژیانی کرێکاران و پاراستنی مافەکانیان، لەم ڕووەشەوە، پابەندبوونی خۆمان بە داکۆکیکردن و دابینکردنی مافەکانی کرێکاران لە ڕووی تەندروستی و سەلامەتی پیشەیی و مافە یاساییەکان و باشترکردنی هەلومەرجەکانی کارکردنیان دووپات دەکەینەوە.

ڕۆژی جیهانیی کرێکاران پیرۆز بێت و هیوادارم هەمیشە مافەکانیان پارێزراو بێت و تەندروست بن.

مەسرور بارزانی
سەرۆکی حکوومەتی هەرێمی کوردستان

 
 
 
 
کوردستان24 دیجیتاڵ میدیا ,