"پرۆژەی نێوان كریستیانۆ رۆناڵدۆ و نەسری سعوودیە شكستی هێنا
"كریستیانۆ لە یانەی نەسرەوە بۆ یانەیەكی بەهێزی بەرازیل"
بەپێی هەواڵێکی مارکا، یەکێك لەو چوار یانەیەی بەڕازیل کە لە جامی جیهانی یانەکان یاری دەکەن، بە شێوەی فەرمی ئۆفەریان پێشكەشی کریستیانۆ رۆناڵدۆ كردووە و سەرنجی ئەستێرە پۆرتوگالییەكەیان راكێشاوە.
پڕۆژەی کریستیانۆ رۆناڵدۆ و ئەلنەسر سەری نەگرت، ئەمساڵ تەنانەت تاقە جامێکیان نەبردەوە و تەنانەت یانە سعوودییەكە نەیتوانی بۆ چامپیۆنزلیگی ئاسیاش سەربكەوێت، ئەمەش بیركردنەوەی یانەی نەسری بەرامبەر كریستیانۆ رۆناڵدۆ گۆڕیوە و رەنگە هەردوولایان رازی بن لەیەكتر جیاببنەوە، لەم نێوەندەشدا ئەستێرە پورتوگالییەكە ئۆفەرێكی باشی لە بەڕازیلەوە پێگەیشتووە.
تووڕەیی رۆناڵدۆ لە دوایین یاریدا زۆر شتی ئاشکرا کرد، بەتایبەت دۆڕان بەرامبەر بە یانەی ئیتیحاد كە تێیدا كەریم بێنزێما رابەرایەتی ئەو یانەیەی دەكرد، پێشوتر رۆناڵدۆ داوای بەهێزکردنی پێکهاتەی کردبوو و تەنانەت گواستنەوەی جۆن دۆرانی كۆلۆمبیش هیچی بۆ نەسرییەکان زیاد نەكرد و نەیتوانی ببێتە پاڵپشتییەكی باش بۆ ئەوەی نەسر خەونی بردنەوەی نازناوی خولی رۆشن بهێنێـتە دی. هەربۆیەش ئەگەری زۆرە رۆناڵدۆۆ ئاوڕێک لە بەڕازیل بداتەوە و لە جامی جیهانی یانەکان یاری بکات.
هەرچەند بوونی رۆناڵدۆ لە سعودیە کاریگەری خۆی هەبووە، بەڵام یانە عەربییەکان زیاتر سەرکەوتنیان دەوێت. ئەمەش لە كاتێكدایە هیچ كامێك لە یانەكانی نەسر و هیلال بە بوونی كریستیانۆ و نێیمار نەیانتوانی ئاستێكی بەرزتر پێشكەش بكەن، لە بەرامبەردا کەریم بێنزێما و یانەکەی توانیویانە کۆتایی بە بە سەردەمی پادشایەتی هیلال بهێنن و نازناوی ئەم وەرزەی خولی سعوودیەیان یەكلایی كردەوە.
ئێستا رۆناڵدۆ لە دووڕیانییەکدا ماوەتەوە، دەستەوارەکەی یانە بەڕازیلییەکە و بەشداریکردنی لە جامی جیهانی یانەکان، یان لە سفرەوە لەگەڵ ئەلنەسر دەست پێبکاتەوە.
بە گوێرەی رۆژنامەی ماركای ئیسپانیا، هەر چوار یانە بەڕازیلییەكەی بەشداربوو لە مۆندیالی یانەكانی ئەم هاوینە: فلامینگۆ، پاڵمیراس، بۆتافۆگۆ و فلۆمنینزی ئامادەن كریستیانۆ رۆناڵدۆ بگوازنەوە. ئەمەش لە كاتێكدایە کریستیانۆ رۆناڵدۆ زۆر بە باشی لەگەڵ ژیانی سعودیە راهاتووە، بەڵام پێدەچێت ئەستێرە پۆرتوگالییەكە لەو پرۆژەیەی ئێستای یانەی نەسر بێهیوا بوو بێت، راستە پارەیەكی خەیاڵی دەستكەوت، بەڵام دەستكەوتە وەرزشییەكانی لە شوێنی خۆی وەستا و هیچ پێشكەوتنێكی بەرچاوی بەخۆیەوە نەبینی.
ئامادەکردنی: محەمەد شەهدی
