گۆتێرێز "دڕندانەترین قۆناغی شەڕی غەززە" ئیدانە دەکات

ئەنتۆنیۆ گۆتێرێز، سکرتێری گشتیی نەتەوە یەکگرتووەکان ڕایگەیاند "لە کاتێکدا فەڵەستینییەکان لە غەززە بەدەست قۆناغی ململانێ و دڕندانەوە گرفتارن، ئیسرائیل هێرشە سەربازییەکانی توندتر دەکات."

گۆتێرێز لە بەیاننامەیەکدا ڕایگەیاندووە "نزیکەی 80 ڕۆژە ئیسرائیل ڕێگری لە چوونە ژوورەوەی هاوکارییە نێودەوڵەتییە ڕزگارکەرەکانی ژیان کردووە و تەواوی دانیشتوانی غەززە ڕووبەڕووی مەترسی برسێتی بوونەتەوە."

گوتیشی: هێرشی سەربازی ئیسرائیل بە ئاستی ترسناکی مردن و وێرانکاری بەرەو هەڵکشان دەچێت.

دەشڵێت: ئەمڕۆ لە سەدا 80ـی غەززە یان وەک ناوچەیەکی سەربازی ئیسرائیل پۆلێن کردووە، یان ناوچەیەک فەرمانی بەجێهێشتنی دانیشتووانی غەززە دراوە.

ئەمینداری گشتیی جەختی لەوە کردەوە کە ئیسرائیل بەپێی یاسا مرۆییە نێودەوڵەتییەکان ئەرکی ڕوونی هەیە. وەک دەسەڵاتی داگیرکەر دەبێت ڕازی بێت بە ڕێگەدان و ئاسانکاری بۆ یارمەتییە پێویستەکان.

دوای وەستانی دانوستانە ناڕاستەوخۆکان لەگەڵ بزووتنەوەی حەماس بۆ درێژکردنەوەی ئاگربەستی دوو مانگە، ئیسرائیل لە 18ـی ئادارەوە دەستی بە هێرشەکانی کردەوە.

لە دووشەممەی ڕابردووەوە بۆ یەکەمجار لە ماوەی زیاتر لە دوو مانگدا هاوکارییە مرۆییەکان دەستیپێکرد بۆ چوونە ناو کەرتی غەززە.