بۆ یەکەم جار دوو گەنجی کورد بە پاڵپشتیی 'کوردستان فاوندەیشن' بەشداریی لە دیبەیتی قەتەر دەکەن

بڕیارە دیبەیتی قەتەر ئۆپن بی پی، کە یەکێکە لە سەرەکیترین پرۆگرامەکانی قەتەر فاوندەیشن بۆ پەروەردە و زانست و گەشەپێدانی کۆمەڵگە، لە ڕۆژانی 3 و 4ـی ئۆکتۆبەری 2025، لە دەوحە بەڕێوە بچێت.

لە دیبەیتی قەتەر، بۆ یەکەم جار دوو گەنجی کورد بەناوەکانی 'ئازیا خالید حەسەنی تەمەن 16 ساڵ  و یارا هێرش سەعیدی تەمەن 17 ساڵ' بە پاڵپشتی و سپۆنسەری 'کوردستان فاوندەیشن' بەشداریی لە پێشبڕکێکە دەکەن، کە ئامانج لێی بەهێزکردنی نەوەی داهاتووە بە لێهاتوویی و بیرکردنەوەی ڕەخنەگرانە لەبەردەم خەڵکدا.

هەروەها ئەم پاڵپشتییەی کوردستان فاوندەیشن هەنگاوێکی گەورەیە لە نوێنەرایەتیکردنی تواناکانی گەنجانی کورد لە بۆنە و و پێشبڕکێ جیهانیەکاندا، بەشداریی ئەو دووگەنجە کوردەش جەخت لەسەر ئەرکی دامەزراوەی کوردستان فاوندەیشن بۆ بەهێز کردنی نەوەی داهاتوو و پتەوکردنی پەیوەندییەکان لەگەڵ دامەزراوە نێودەوڵەتییەکانی وەکو قەتەر فاوندەیشن دەکاتەوە. 

کوردستان فاوندەیشن، تۆڕێکی ڕێکخراویی ناحکوومی قازانج نەویستە، بە ئامانجی باشترکردنی کۆمەڵگە لەگەڵ بەها بەرز و سەردەمیەکان، کار لەسەر بەهێزکردن و پێشخستنی هەرێمی کوردستان لەسەر بنەماکانی نیشتمانیبوون، بونیادنان و پێشکەوتن دەکات.