مه‌سرور بارزانی: سامانی سروشتیی موڵکی هیچ حزب و کەسێک نییە

مەسرور بارزانی، سەرۆکی حکوومەتی هەرێمی کوردستان، پڕۆژەی ستراتیژیی گەیاندنی بۆریی گازی سروشتی لە هەولێرەوە بۆ دهۆک كردەوە و ڕایگەیاند، کوردستان شوێنێکی دەوڵەمەندە بە سەرچاوە سروشتییەکان؛ گوتیشی: ئەم سامانە سروشتییەی لە کوردستان هەیە، موڵکی هەموو خەڵکی کوردستانە، موڵکی هیچ حزب و کەسێک نییە.

سەرۆکی حکوومەت لە گوتارێكدا كە لە ڕێورەسمی كردنەوەی پرۆژەكە لە دهۆک پێشكەشی كرد، گوتی: سوپاس بۆ خودا ئەو دەرفەتەی بە ئێمە دا ئەو پرۆژانە جێبەجێ بکەین و بیخەینە خزمەتی خەڵکی کوردستان.

مەسرور بارزانی گوتیشی: "بە شێوەیەكی گشتیی دەڤەرەكانی هەرێمی كوردستان لە ڕووی سەرچاوە سروشتییەكانەوە دەوڵەمەندن؛ هەم گاز، هەم نەوت و كانزاکان لە هەرێمی كوردستان زۆرن، ئەو سامانە سروشتییەش، سامانی هەموو خەڵكی كوردستانە، موڵكی هیچ كەسێك و هیچ حزب و لایەنێكی سیاسیی نییە، پێویستە ئێمە بە باشترین شێوە بتوانین سوود لەو سامانە سروشتیانە وەربگرین و بیخەینە خزمەتی هاووڵاتیانی كوردستان، چۆن نەوت لێرە بەكار دەهێندرێت بۆ هەموو بەشەكانی هەرێمی كوردستان، هەموو شار و پارێزگاكانی هەرێمی كوردستان، هەر جێیەكیش گازی لێبێت، بێگومان بۆ هەموو هەرێمی كوردستان بێ جیاوازیی بەكار دەهێندرێت".

پرۆژەی بۆریی گەیاندنی گازی سروشتی لە هەولێرەوە بۆ دهۆک بە درێژیی 198 کیلۆمەتر بە بڕی 591 ملیۆن دۆلار لەلایەن کۆمپانیای کارەوە و تایبەتە بە وێستگەی کارەبای هەزار مێگاواتی کواشێ لە قەزای سێمێل.

وێستگەی کارەبای غازی کواشێی، پرۆژەیەکی گرنگی کەرتی بەرهەمهێنانی وزەیە لە هەرێمی کوردستان بە توانای به‌رهه‌مێنانی 1000 مێگاوات کارەبا، پرۆژەکە لەلایەن کۆمپانیای "ماس گروپ هۆڵدینگ"،  بە گرێبەست لەگەڵ حکوومەتی هەرێمی كوردستان لە چوارچێوەی سیستەمی (Build, Own, Operate) جێبەجێ دەکرێت.