پەیامنێری کوردستان24 لە بەغدا: فڕۆکەخانەی بەغدا چۆڵکرا
ئەمڕۆ شەممە، 28ـی شوباتی 2026، شڤان جەباری، پەیامنێری کوردستان24 لە بەغدا رایگەیاند؛ فڕۆکەخانەی بەغدا چۆڵکرا.
لەلایەکی دیکەوە وەزارەتی گواستنەوەی عێراق بڕیارێکی بەپەلەی دەرکردووە و تێیدا ئاسمانی عێراقی بە رووی سەرجەم گەشتە ئاسمانییەکاندا بەتەواوی داخستووە.
لای خۆیەوە ئەحمەد هۆشیار، بەڕێوەبەری فڕۆکەخانەی نێودەوڵەتی هەولێر بە هۆشمەند سادق پەیامنێری کوردستان24ـی راگەیاند؛ گەشتە ئاسمانییەکان لە فڕۆکەخانەی نێودەوڵەتی هەولێر راگیران.
بەڕێوەبەری فڕۆکەخانەی نێودەوڵەتی هەولێر راشیگەیاند؛ زیاتر لە 10 خولەکە تەواوی گەشتەکان لە سەرانسەری عێراق راگیراون.
ئەمڕۆ ئیسرائیل هێرشە ئاسمانییەکانی بۆ سەر ئێران دەستپێکرد. سەرچاوە رۆژنامەوانییەکانیش دەڵێن، هێرشەکان بە هاوبەشی لەگەڵ ئەمریکا دەکرێن.
ئیزرائیل کاتس، وەزیری بەرگریی ئیسرائیل رایگەیاند، بەیانیی ئەمڕۆ شەممە، "هێرشی پێشوەختەمان لە دژی ئێران دەست پێکردووە و ژمارەیەک هێرشی ئاسمانیمان کردووەتە سەر تارانی پایتەختی ئەو وڵاتە."
هەرچەندە بە فەرمی بەرپرسانی واشنتن هیچ شتێکیان لەبارەی هێرشەکان رانەگەیاندووە؛ بەڵام میدیاکانی ئیسرائیل ئاماژەیان بەوە کردووە، هێرشەکان بە هاوبەشی لەگەڵ ئەمریکا دەکرێن.
هاوکات میدیاکانی ئێران بڵاویان کردووەتەوە، بەردەوام دەنگی تەقینەوەی نوێ لە ناوەندی تارانی پایتەختی ئێران دەبیسترێت و لە بەیانییەوە چەندان شوێنی جیاواز بۆمباران کراون.
کەنالی 12ـی ئیسرائیلیش رایگەیاند، هێرشی ئاسمانی کراوەتە سەر دەیان پێگەی سەربازی لە ئێران. بە گوێرەی هەمان سەرچاوە، ئیسرائیل ئاسمانی خۆی بە تەواوەتی داخستووە و چەندان کۆمپانیای هێڵی ئاسمانی گەشتە ئاسمانییەکانیان بۆ تەلئەڤیڤ هەڵوەشاندووەتەوە.
حکوومەتی ئیسرائیل باری نائاسایی لە ناوخۆی وڵاتەکە راگەیاندووە و دەوامی قوتابخانە و ناوەندەکانی خوێندنی راگرت. بەهۆی ئەم دۆخەشەوە هاتوچۆی هاووڵاتییان لە هەندێک ناوچەی ئیسرائیل سنووردار کراوە.