حكومهتی ههرێم راپۆرتی دیلۆیتی تایبهت بهوردبینی كەرتی نەوت و گازی له 9 مانگی ساڵی رابردوودا بڵاوكردهوه
ئهنجومهنی وهزیران بۆ پەرەپێدانی شەفافییەت لە بواری کەرتی نەوت و گاز، هەڵسەنگاندن بۆ ئاشکراکردنی زانیارییهكان دەکات
K24 – ههولێر:
لهسهر بڕیاری ئهنجومهنی وهزیران، ئەنجومەنی هەرێمی بۆ كاروباری نەوت و گاز لە هەرێمی كوردستان دهقی راپۆرتی كۆمپانیای دیلۆیتی بڵاوكردهوه.
كۆمپانیای دیلۆیت راپۆرتی پشتڕاستکراوی تایبەت بە داتا و زانیاریی نوێ دەربارەی هەناردەكردن، بەكاربردن، خەرجی و داهاتەكانی نەوت لە (1ی کانونی دووەم/ یهنایری 2020 تا 30ی ئەیلولی 2020)ی ئاماده كردووه.
راپۆرتەکە بە زمانەکانی کوردی و عەرەبی و ئینگلیـزی بەردەستە، شیکردنەوەیەکی چارەکە ساڵانە پێشکەش دەکات دەربارەی زانیارییەکانی هەناردەکردنی نەوت و رێژەی نرخەکان. پشتڕاستکردنەوەی زانیارییەکان لەلایەن کۆمپانیای (دیلۆیت)ەوە ئەنجام دراوە.
لە چوارچێوەی پڕۆژەی وردبینی سەربەخۆی كەرتی نەوت و گاز لە هەرێمی كوردستان و وەك بەشێك لە دەستپێشخەری تایبەت بە شەفافییەت لە بەرنامەی کاری ئەنجومەنی وەزیران، حکومەتی هەرێمی کوردستان بە بەردەوامی هەڵسەنگاندن بۆ ئاشکراکردنی زانیاری سەربار دەکات بۆ پەرەپێدانی شەفافییەت لە بواری کەرتی نەوت و گاز. بەمجۆرە، حکومەتی هەرێمی کوردستان لە ساڵی 2017ەوە بە بەردەوامی راپۆرتەکانی وردبینیکردنی کەرتی نەوت و گاز لە هەرێمی کوردستان پشتڕاستکراوە لەلایەن کۆمپانیای (دیلۆیت)ەوە بۆ رای گشتی بڵاو دەکاتەوە.
لە ساڵی (2019)ەشەوە داتا و زانیاری پێشکەش کردووە دەربارەی رەسیدی پێشەکی دراو بە هەرێمی کوردستان کە قەرزاری کڕیارەکانی نەوتە.
لە ساڵی 2020دا ئاشکراکردنی زانیارییەکان فراوان کران و هاوتاکردنی داتاکانی نێوان بەرهەمهێنان و هەناردەکان و بەکاربردنی ناوخۆشی گرتەوە.
ئەنجومەنی هەرێمی بۆ كاروباری نەوت و گاز بەردەوام دەبێت لەسەر كاركردن بۆ برەودان و دەوڵەمەندكردنی راپۆرتەكانی وردبینی و پێداچوونەوە بە پشتبەستن بە سەرنج و پێشنیازی لایەنە پەیوەندیدارەكان، لەناویشیاندا كۆمەڵگەی نێودەوڵەتی، سەرەڕای کارکردن بە هاوبەشی لەگەڵ دامەزراوەکانی چاودێری و وردبینی هەرێمی کوردستان بۆ پەرەپێدانی توانا مرۆییە ناوخۆییەکانی بواری وردبینیی کەرتی نەوت و گاز، و حكومەتی هەرێمی كوردستان دووپاتی پابەندبوونی خۆی دەكاتەوە لە بەرامبەر هاووڵاتییانی هەرێمی كوردستان كە بەردەوام دەبێت لەسەر وردبینی و پێداچوونەوەی سەربەخۆ بۆ سێكتەری نەوت و گاز بە هەموو پرۆسە و بەشەكانییەوە.
لە خوارەوە دەتوانن دەقی راپۆرتی دیلۆیت بە ئیمزاكراوی بە فۆرمی (PDF) داتاکانی پشتڕاستكراوی نەوتی خاوی ههرێمی كوردستان بۆ (1ی کانونی دووەم/ یهنایری 2020 تا 30ی ئەیلولی 2020) دەستبخەن.
بەرهەمی نەوت و هەناردە و بەکاربردن و داهات لە ماوەی 1ی کانونی دووەمی 2020 تاکو 31ی ئازاری 2020
بەرهەمی نەوت و هەناردە و بەکاربردن و داهات لە ماوەی 1ی نیسانی 2020 تاکو 30ی حوزەیرانی 2020
بەرهەمی نەوت و هەناردە و بەکاربردن و داهات لە ماوەی 1ی تەمموزی 2020 تاکو 30ی ئەیلوولی 2020