سەرۆک بارزانی: هێرشەکان بەبێ گوێدانە بنەماکانی دراوسێتی و یاسای نێودەوڵەتییەکان ئەنجام دراون
سەرۆک بارزانی سەرکۆنەی هێرشە مووشەکییەکی ئێران بۆ سەر بارەگاکانی هێزی پێشمەرگە دەکات و رایدەگەیەنێت، ئەو پەلامارە دوژمنکارانەیە و هیچ پاساوێک هەڵناگرێت، ئاماژەشی داوە، ئەم هێرشانە لە کاتێکدایە، هەرێمی کوردستان بەشێک نەبووە لەم شەڕە و هیچ کات هەڕەشە نەبووە بۆ سەر دراوسێکانی.
سەرۆک بارزانی راگەیەندراوێکی بڵاو کردووەتەوە و تێیدا ئاماژەی داوە، زۆر بە توندی ئیدانەی ئەو پەلامارە دەکەم کە بەرەبەیانیی ئەمڕۆ سێشەممە 24ی ئاداری 2026، بە مووشەکی ئێرانی کرایە سەر بارەگاکانی هێزی پێشمەرگەی کوردستان.
سەرۆک بارزانی دەشڵێت: بە داخێکی زۆرەوە لە ئەنجامدا ژمارەیەک پێشمەرگەی قارەمان شەهید و ژمارەیەکی تریش بریندار بوون. پرسە و سەرەخۆشیی خۆم ئاراستەی خانەوادەی شەهیدانی ئەو پەلامارە ناڕەوایە دەکەم و خۆم بە هاوبەشی خەمیان دەزانم و هیوای چاکبوونەوەی خێرا بۆ برینداران دەخوازم.
لە پەیامەکەی سەرۆک بارزانی هاتووە، ئەو پەلامارە دوژمنکارانەیە و هیچ پاساوێک هەڵناگرێت؛ ئاماژەشی داوە، ئەوە بۆ جاری چەندەمە ئەم جۆرە هێرشانە بەبێ گوێدانە بنەماکانی دراوسێتی و یاسای نێودەوڵەتی بەرانبەر هەرێمی کوردستان ئەنجام دەدرێت.
سەرۆک بارزانی جەختیشی لەوە کردووەتەوە، ئەوە لە حاڵێکدایە کە هەرێمی کوردستان بەشێک نەبووە لەم شەڕەی ئێستا لە ناوچەکەدا هەیە و هیچ کات هەڕەشە نەبووە بۆ سەر دراوسێکان.
دەشڵێت: "پێشمەرگە ئازیزترین و بەنرخترین سەرمایەی گەلەکەمانە."
دەقی پەیامی سەرۆک بارزانی
پەیامێک لە سەرۆک بارزانییەوە
بەناوی خودای مەزن و دلۆڤان
زۆر بە توندی ئیدانەی ئەو پەلامارە دەكەم کە بەرەبەیانیی ئەمڕۆ بە موشەکی ئێرانی كرایە سەر بارەگاكانی هێزی پێشمەرگەی كوردستان. بە داخێكی زۆرەوە لە ئەنجامدا ژمارەیەك پێشمەرگەی قارەمان شەهید و ژمارەیەكی تریش بریندار بوون. پرسە و سەرەخۆشیی خۆم ئاراستەی خانەوادەی شەهیدانی ئەو پەلامارە ناڕەوایە دەكەم و خۆم بە هاوبەشی خەمیان دەزانم و هیوای چاكبوونەوەی خێرا بۆ برینداران دەخوازم.
ئەو پەلامارە دوژمنكارانەیە و، هیچ پاساوێك هەڵناگرێت. ئەوە بۆ جاری چەندەمە ئەم جۆرە هێرشانە بە بێ گوێدانە بنەماكانی دراوسێتی و یاسای نێودەوڵەتی بەرانبەر هەرێمی كوردستان ئەنجام دەدرێت. ئەوە لە حاڵێكدایە كە هەرێمی كوردستان بەشێک نەبووە لەم شەڕەی ئێستا لە ناوچەکەدا هەیە و هیچكات هەڕەشە نەبووە بۆ سەر دراوسێکان.
پێشمەرگە ئازیزترین و بەنرخترین سەرمایەی گەلەکەمانە.
مسعود بارزانی
24ی ئاداری 2026