پاتریارکی کڵێسای رۆژهەڵاتی ئاشووری سەرکۆنەی هێرشەکانی سەر پێشمەرگە دەکات

بارەگای پاتریارکی کڵێسای رۆژهەڵاتی ئاشووری لە هەولێر، نیگەرانی و دڵتەنگی خۆی بۆ شەهیدبوونی 6 پێشمەرگە و برینداربوونی نزیکەی 30 کەس لە سنووری ئیدارەی سەربەخۆی سۆران رادەگەیەنێت و داوا دەکات رێز لە ئاشتی و سەقامگیری وڵات بگیرێت.

بەگوێرەی راگەیەندراوێکی بارەگای پاتریارکی کڵێسای رۆژهەڵاتی ئاشووریی، لە راگەیەندراوەکەدا ئاماژە بەوە دراوە کە هێرشەکان بە مووشەکی بالیستی کراونەتە سەر بارەگاکانی فیرقەی 7ی پیادەی دەڤەری 1 و هێزی فیرقەی 5، ئەوەش لە کاتێکدا پێشمەرگە خەریکی ئۆپەراسیۆنێکی ئاسایی خۆیان بوون لە ناوچەکەدا.

مار ئاوا سێیەم، پاتریارکی کڵێسای رۆژهەڵاتی ئاشووری لە جیهان، سەرەخۆشی و هاوخەمی خۆی ئاراستەی کەسوکاری شەهیدان، حکومەتی هەرێمی کوردستان و سەرجەم هاووڵاتییان دەکات و هیوای چاکبوونەوەی خێرا بۆ بریندارەکان دەخوازێت.

لە بەشێکی دیکەی راگەیەندراوەکەدا هاتووە: "نزا دەکەین بۆ کۆتاییهێنان بە هەموو جۆرە دەستدرێژییەک بۆ سەر خەڵکی بێتاوان و هاووڵاتییانی مەدەنی، داواش دەکەین رێز لە ژیانی خەڵک و ئاشتی ئەم وڵاتە بگیرێت و تەبایی بەسەر توندوتیژی و دوژمنکاریدا زاڵ بێت."

پاتریارکی کڵێسای رۆژهەڵاتی ئاشووری جەخت لە پێویستیی یەکڕیزی و برایەتی نێوان پێکهاتەکانی عێراق و هەرێمی کوردستان دەکاتەوە و هیوا دەخوازێت خودای گەورە ئاشتی و تەبایی بە هەموان ببەخشێت.