چەند پێگەیەکی حەشدی شەعبی لە مووسڵ و ئەنبار کرانە ئامانج
هێرشەکانی ئەمریکا و ئیسرائیل بۆ سەر پێگە سەربازییەکانی حەشدی شەعبی لە ناوچە جیاوازەکانی عێراق بەردەوامە و میدیای ئەو هێزەش بانگەشەی ئەوە دەکات، خەڵکی سڤیلیش کراوەتە ئامانج.
بەیانیی ئەمڕۆ شەممە (04ـی نیسانی 2026)، فڕۆکە جەنگییەکانی ئەمریکا و ئیسرائیل چەند پێگەیەکیان لە سنووری پارێزگای نەینەوا بۆردومان کرد.
لەوبارەوە، فەرماندەیی پرۆسەکانی نەینەوای دەستەی حەشدی شەعبی لە راگەیەنراوێکدا ئاماژەی بەوە کرد، فڕۆکە جەنگییەکانی ئەمریکا و ئیسرائیل لە هێرشێکیاندا کۆگایەکی پەتاتەیان لە ناوچەی "شرێخان" لە شاری مووسڵ بۆردومان کردووە.
بەپێی راگەیەنراوەکە، ئەم کۆگایە دەکەوێتە چوارچێوەی کەرتی بەرپرسیارێتیی لیوای 34 و هی هاووڵاتییەکی ئاساییە.
حەشدی شەعبی جەخت دەکاتەوە، بەپێی زانیارییە سەرەتاییەکان شوێنەکە تەنیا دامەزراوەیەکی سڤیل بووە و پەیوەندیی بە بابەتی سەربازییەوە نەبووە.
هاوکات بەرەبەیانی ئەمڕۆ ناوچەیەکی "قائیم" لە پارێزگای ئەنبار بۆردومان کرا.
میدیاکانی سەر بە بەرەی بەرگری گرتەیەکی ڤیدیۆییان بڵاوکردووەتەوە و روونیشیان کردەوە، ناوچەیەکی سەر بە قەزای قائیم لە سنووری پارێزگای ئەنبار لەلایەن ئەمریکا و ئیسرائیلەوە بۆردومان کراوە.