ئەنجوومەنی نوێنەرانی ئەمریکا بودجەی جەنگی دژی ئێران پەسەند کرد

ئەنجوومەنی نوێنەرانی ئەمریکا بودجەیەکی بە بڕی 95 ملیار دۆلار پەسەند کرد کە بودجەی تایبەت بە ئۆپراسیۆنە سەربازییەکانی پەیوەست بە جەنگی ئێرانی تێدایە و پڕۆژەکەش بۆ بڕیاردانی کۆتایی رەوانەی ئەنجوومەنی پیران کرا. 

مایک جۆنسن، سەرۆکی ئەنجوومەنی نوێنەرانی ئەمریکا، توانی فراکسیۆنە دابەشبووەکەی لە دەوری ئەو پلانە یەکبخات و بە زۆرینەی 216 دەنگ بەرامبەر 214دەنگ پەسەند کرا. پارێزگارەکان دەنگیان بەو پلانە دا کە سەرجەم خەرجییە نوێیەکانی لە رێگەی زیادکردنی کورتهێنانی بودجەی فیدراڵییەوە دابین دەکرێت، ئەمەش دوای ئەوەی تیمی جۆنسن بەڵێنیان دا، دوای هەڵبژاردنەکانی مانگی تشرینی دووەم، هەوڵ بۆ کەمکردنەوەی خەرجییەکان بدەن."

بەگوێرەی  ناوەڕۆکی پڕۆژەکە، بڕی 73 ملیار دۆلار بۆ وەزارەتی بەرگری و ئاژانسەکانی هەواڵگری تەرخان کراوە بە مەبەستی دابینکردنی تێچووی ئۆپراسیۆنە سەربازییەکان و جەنگی دژی ئێران، هەروەها 12 ملیار دۆلار بۆ هاوکاریکردنی ئەو جووتیارانە دیاریکراوە کە بەهۆی جەنگی بازرگانییەوە زیانیان بەرکەوتووە، لەگەڵ تەرخانکردنی 10 ملیار دۆلار بۆ بەرنامەکانی تایبەت بە هەڵبژاردن.

هاوکات لەگەڵ ئەم بودجەیەدا، ئەنجوومەنی نوێنەران پڕۆژەیاسای ساڵانەی سیاسەتی بەرگری وڵاتەکەشی پەسەند کرد، تێیدا رێگە بە خەرجکردنی بڕی 1.15 تریلیۆن دۆلار بۆ وەزارەتی بەرگریی ئەمریکا دەدرێت، ئەمەش وەک بەرزترین ئاستی خەرجی سەربازی لە مێژووی ئەو وەزارەتەدا ئەژمار دەکرێت.