ئەمساڵ 77 کەس لە رووبارەکانی کوردستاندا خنکاون

ئامارەکانی خنکان لە چەم و رووبارەکانی هەرێمی کوردستان بەراورد بە ساڵی رابردوو بەرزبوونەوەی بەرچاویان بەخۆوە بینیوە و تاوەکو ئێستا 77 کەس گیانیان لەدەستداوە.

سەرەڕای بەردەوامیی هۆشدارییەکان و بڵاوکردنەوەی رێنماییەکان لەلایەن تیمەکانی بەرگریی شارستانییەوە، رووداوەکانی خنکان لە چەم و رووبارەکانی هەرێمی کوردستان روویان لە زیادبوون کردووە. لە زۆر شوێندا تابلۆی "مەلەکردن قەدەخەیە" دانراوە، بەڵام هاووڵاتییان رێنماییەکان پشتگوێ دەخەن و لە پشتی تابلۆکانەوە مەلە دەکەن.

ئەمڕۆ یەکشەممە، 04ـی تشرینی یەکەمی 2026، سەرکەوت کاڕەش، گوتەبێژی بەرگریی شارستانیی هەرێمی کوردستان، بە کوردستان24ـی راگەیاند، لە سەرەتای ئەمساڵەوە تاوەکو ئێستا 77 کەس لە ئاوی رووبار و چەمەکاندا خنکاون و تیمەکانیان توانیویانە تەرمی 76 کەس بدۆزنەوە. روونیشیکردەوە، تەنیا تەرمی یەکێک لە خنکاوەکان نەدۆزراوەتەوە و رووداوەکەش لە سنووری ئیدارەی سەربەخۆی گەرمیان بووە.

بەپێی ئامارەکانی بەرگریی شارستانی، ژمارەی رووداوەکانی خنکان بەسەر شار و ئیدارە سەربەخۆکاندا بەم شێوەیە دابەش بوون: 

هەولێر: 21 کەس. 

سۆران: 13 کەس.

زاخۆ: 11 کەس. 

سلێمانی: 9 کەس. 

دهۆک: 7 کەس. 

راپەڕین: 5 کەس.

گەرمیان: 5 کەس.

ئاکرێ: 1 کەس.

سەبارەت بە هۆکارەکانی زۆربوونی رووداوەکان، گوتەبێژی بەرگریی شارستانی ئاماژەی بەوە دا، بەرزبوونەوەی ئاستی ئاو و توانەوەی بڕێکی زۆری بەفر هۆکاری سەرەکین بۆ تیژڕەویی ئاوی رووبارەکان، چونکە هێزێکی زۆر لە مەلەوان دەبڕێت و ساردیی ئاوەکەش دەبێتە هۆی گرژبوونی ماسولکەکان. هەروەها گوتی، بەشێک لە خنکاوەکان مەلەوانێکی باش بوون، هاوکات ژمارەیەک لە قوربانییەکانیش گەشتیاری شارەکانی ناوەڕاست و باشووری عێراقن.

بەرزبوونەوەی ئامارەکان لە کاتێکدایە، لە تەواوی ساڵی رابردوودا تەنیا 68 رووداوی خنکان لە سەرتاسەری هەرێمی کوردستان تۆمارکرابوون، بەڵام بۆ ئەمساڵ هێشتا دوو مانگ بۆ کۆتایی ساڵ ماوە و ئامارەکە گەیشتووەتە نزیکەی 77 رووداو.

هەرێمی کوردستان بەهۆی هەبوونی چەندین چەم و رووباری گەورەی وەک زێی گەورە، زێی بچووک، خابوور و سیروان، ساڵانە لە وەرزی هاویندا دەبێتە رووگەی سەدان هەزار گەشتیار. بەتایبەتی گەشتیارانی ناوەڕاست و باشووری عێراق بۆ رزگاربوون لە شەپۆلی گەرما، روو لە ناوچە گەشتیارییە ئاوییەکانی کوردستان دەکەن.