مووشەکی رووسی لە باشووری رۆژهەڵاتی پۆڵەندا کەوتە خوارەوە

وارسۆ رۆژی هەینی کەوتنی لانیکەم یەک مووشەکی رووسی لە باشووری رۆژهەڵاتی پۆڵەندا راگەیاند دوای هێرشێکی چڕی شەوی رابردووی مۆسکۆ بۆ سەر ئۆکراینا، هاوکات سەرۆک وەزیرانی پۆڵەندا پێشێلکردنی کایەی ئاسمانیی وڵاتەکەی پشتڕاستکردەوە و داوای کۆبوونەوەی بەپەلەی حکوومەتی کرد.

رۆژی هەینی 20ی تشرینی دووەمی 2026 رایگەیاند، لانیکەم یەک مووشەکی رووسی لە باشووری رۆژهەڵاتی وڵاتەکە کەوتووەتە خوارەوە، ئەوەش لە کاتێکدایە کە مۆسکۆ شەوی پێنجشەممە لەسەر هەینی هێرشێکی فراوانی کردووەتە سەر ئۆکراینا، هێزە ئەمنییەکانی پۆڵەنداش لێکۆڵینەوە لە سێ شوێن دەکەن کە تێیاندا پارچە و تەقەمەنی کەوتوونەتە خوارەوە و گومان دەکرێت یەکێکیان درۆن بێت و ئەوی دیکەش مووشەکێکی دیکە بێت.

پێشتر دۆناڵد تاسک، سەرۆک وەزیرانی پۆڵەندا، داوای کۆبوونەوەی بەپەلەی حکوومەتی کردبوو و پێشێلکردنی کایەی ئاسمانیی وڵاتەکەی راگەیاندبوو، کە ئەندامی هاوپەیمانیی ناتۆیە.

شەوی رابردوو، رووسیا هێرشێکی چڕی بە مووشەک و درۆن کردە سەر ئۆکراینا کە بووە هۆی کوژرانی لانیکەم هەشت کەس لە کیێڤ، ئەوەش رۆژێک دوای بەڕێوەچوونی لووتکەی سێقۆڵیی رووسیا و ئەمریکا و چین.

لە سەرەتای دەستپێکردنی شەڕی نێوان رووسیا و ئۆکرانیا کە نزیکەی پێنج ساڵ لەمەوبەر دەستیپێکرد، پۆڵەندا کە لە رۆژئاواوە هاوسنووری ئۆکراینایە، چەندین جار راپۆرتی لەبارەی بەزاندنی کایەی ئاسمانی یان کەوتنەخوارەوەی تەقەمەنی لەسەر خاکەکەی بڵاوکردووەتەوە.

بە گوێرەی میدیاکانی پۆڵەندا، فلادیسلاڤ کۆسینیاک کامیش، وەزیری بەرگریی ئەو وڵاتە، رایگەیاندووە: "سێ شوێنی کەوتنەخوارەوەی تەقەمەنی هەن؛ لە نۆڤی لیبۆڤیتس دەتوانین پشتڕاستی بکەینەوە کە مووشەکی جۆری "+کەی ئێچ-101+"ـە، لە شوێنی دووەمیش باس لە مووشەکێکی دیکە دەکرێت، بەڵام لە شوێنی سێیەم بە ئەگەرێکی زۆر درۆنێکە بە بزوێنەری نەفاس کار دەکات." وەزیری بەرگریی پۆڵەندا ئەوەشی خستەڕوو کە "کەس بریندار نەبووە و هیچ زیانێکیش لە ژێرخان تۆمار نەکراوە."

وڵاتانی ئەوروپا پۆڵەندایان هەڵبژاردووە تا ببێتە یەکێک لەو 5 وڵاتەی نوێنەرایەتییان دەکات لە دانوستانەکانی داهاتووی تایبەت بە ئۆکراینا کە بە سەرکردایەتیی ویلایەتە یەکگرتووەکانی ئەمریکا بەڕێوەدەچن.

وارسۆ بە یەکێک لە دیارترین هاوپەیمانەکانی ئۆکراینا دادەنرێت، بە شێوەیەک خاکی پۆڵەندا بووەتە رێڕەوێک بۆ گەیاندنی چەک و کەرەستەی سەربازیی رۆژئاوا بۆ ئۆکراینا و هاوکات میوانداریی زیاتر لە ملیۆنێک ئاوارەی ئۆکرانی دەکات.